یاریگا –
كارلۆ ئانچێلۆتی ئیتاڵی و راهێنەری یانەی ریال مەدریدی ئیسپانی گورزێكی دیكەی كوشندەی بەركەوت پێش یارییە چارەنوسسازەكەیان بەرامبەر جیڕۆنا.
وا بڕیارە رۆژی شەممەی داهاتوو كاتژمێر 20:30 بە كاتی كوردستان ریال مەدرید لە یاریگای سانتیاگۆ بێرنابیۆی تایبەت بە خۆی میوانداری جیڕۆنا بكات، لە میانی یارییەكانی هەفتەی 24ی لالیگای ئیسپانیا.
🧢 @MrAncelotti 🧢#RMCity pic.twitter.com/sxbJxvkhaX
— Real Madrid C.F. (@realmadrid) February 7, 2024
لەم وەرزەدا یانە شاهانەكە بەهۆی زۆری پێكانەكان دەناڵێنێت و سێ یاریزانی تووشی پچڕانی بەستەری ئەژنۆ بوون ئەوانیش ئیدێر میلیتاو، تیبۆ كۆرتوا و دەیڤد ئالابا.
بەپێی زانیارییەكانی رۆژنامەی ئاس، لە راهێنانەكانی ریال مەدرید هەریەك لە یاریزانان ناچۆ، ڤینیسیۆس و رۆدیگەر ئامادە نەبوون، بەهۆی چاكنەبووەنەوەیان لە پێكان.
هەمان سەرچاوە ئاشكرایكردووە، رۆدیگەر لە یاری بەرامبەر خێتافی تووشی پێكان بوو نەیتوانی بەشداری راهێنانەكان بكات و بەهۆیەوە لە كۆتا دێربی ئامادە نەبوو.
هەروەها ڤینیسیۆس بەهۆێ ئازاری ملەوە لە هۆڵی وەرزشیدا راهێنانی كردووە و ناچۆش بەهۆی ئازاری ماسولكەكانیەوە نەیتوانیووە ئامادە بێت.
ریال مەدرید بە كۆكردنەوەی 58 خاڵ و جیڕۆناش بە 56 خاڵ ریزبەندی یەكەم و دووەمی لالیگایان گرتووە.
