یاریزانێکی هەڵبژاردەی نایجێریا تووشی پێکان بوو
گومان لە بەشداریکردنی ئیهیناچۆش دەکرێت
یاریگا –
ویلفرێد ئێندیدی، ناوەڕاستکاری نایجێری، دوای تووشبوونی بە پێکان. لە لیستی یاریزانانی هەڵبژاردەی نایجێریا هێندرایە دەرەوە.
ئێندیدی لە 29ی دیسێمبەر/کانوونی یەکەمی رابردوودا و لە یاری نێوان لێستەر سیتی و کاردیف سیتی تووشی پێکان بوو، بۆیە لە لیستی یاریزانانی بانگهێشتکراو بۆ جامی نەتەوەکانی ئەفریقا دوورخرایەوە و ئەلحەسەن یوسف، یاریزانی رۆیال ئانڤیرپ شوێنی گرتەوە.
کێلێچی ئیهیناچۆ، هاوتیمی ئێندیدی لە لێستەر سیتی تاوەکو ئێستا پێکانی هەیە و چاکنەبووەتەوە. بڕیارە ئەمڕۆ پشکنینی کۆتایی لە ئەبوزەبی، پایتەختی ئیمارات بکات و بڕیاری کۆتایی لەسەر بدرێت.
ئیهیناچۆ بەشداری لە دوو یاری رابردووی یانەکەی لە چامپیۆنشیپدا نەکردووە، بەو هیوای چاکببێتەوە و بەشداری لە جامی نەتەوەکانی ئەفریقادا بکات.
Goodluck @NGSuperEagles, we are behind you all the way! #LetsDoItAgain #SoarSuperEagles pic.twitter.com/SJesJKsryj
— The NFF 🇳🇬 (@thenff) December 29, 2023
ئەلحەسەن یوسف هیچ یارییەکی نێودەوڵەتی نەکردووە، بەڵام لە وەرزی رابردوودا یارمەتی یانە بەلجیکییەکەیدا ببێتە پاڵەوانی بەلجیکا و بەشداری لە تەواوی یارییەکانی قۆناخی کۆمەڵەکانی چامپیۆنزلیگی ئەم وەرزەدا کردووە.
نایجێریا لە کۆمەڵەی یەکەمی جامی نەتەوەکانی ئەفریقادایە و شانبەشانی هەڵبژاردەکانی گینیای کەمەرەیی، کۆتدیڤوار و گینیا بیساو یاری دەکات.
