داستانی كیلیان ئێمباپێ و ریال مەدرید دەست پێدەكاتەوە
وەرزی كۆتایی دراماكە..
یاریگا –
ئەمڕۆ دووشەممە كیلیان ئێمباپێ دەبێتە یاریزانێكی ئازاد بەو پێیەی دەچێتە كۆتا شەش مانگی گرێبەستەكەی لەگەڵ پاریس سانجێرمان.
چاوەڕوان دەكرێت لاپەڕەیەكی نوێ لە داستانی ئێمباپێ و ریال مەدرید دەست پێبكات، كە لە ساڵانی رابردووەوە تائێستا بەردەوامی هەیە.
ریال مەدرید زیاتر لە جارێك هەوڵی بەدەستهێنانی واژۆی كیلیان ئێمباپێی داوە، دیارترین هەوڵەكانیش لە هاوینی ساڵی 2022 بوو، كە یاریزانەكە نزیك بوو لە بەدیهێنانی خەونەكەی كە یاریكردنە بۆ یانە شاهانەكە بە گرێبەستێكی ئازاد.
بەڵام پاریس سانجێرمان سەركەوتوو بوو لە نوێكردنەوەی گرێبەستەكەی بۆ ماوەی دوو وەرز و تا ساڵی 2024.
⏱️ Cuenta atrás para Mbappé
📞 El Madrid se lanzará a por el Galáctico a partir de esta medianoche: llamada a la madre, contrato y respuesta en 15 días
✅ Tras las 00:00h, será libre para hablar y firmar
✍️ @sergiolopezdv https://t.co/aewWZBJjKs
— Diario AS (@diarioas) December 31, 2023
بەپێی زانیارییەكانی رۆژنامەی ئاس، رۆژی دووشەممە وەرزی كۆتایی كیلیان ئێمباپێ لەگەڵ ریال مەدرید دەست پێدەكات، چونكە دەبێتە یاریزانێكی ئازاد و دەتوانێت گرێبەست لەگەڵ هەر یانەیەك كە بیەوێت واژۆ بكات و لە هاویندا پەیوەندی بە یانەكەوە بكات.
لە راپۆرتەكەشدا ئاماژە بەوەكراوە، ریال مەدرید لە دوای نیوە شەوەوە پەیوەندی بە كیلیان ئێمباپێیوە دەكات، بۆ پێشكەشكردنی ئۆفەری خۆی بۆ بەدەستهێنانی تواناكانی یاریزانەكە.
رۆژنامەکە ناوەڕۆکی ئۆفەرەکەی ریال مەدریدی ئاشکرا نەکردووە، بەڵام ئاماژەی بەوەکردووە، یانە شاهانەكە تا 15ی 1 مۆڵەتی بەو ئەستێرە فەرەنسییە داوە تا بڕیار بدات.
لە كۆتایی راپۆرتەكەی رۆژنامە ئیسپانیەكەشدا هاتووە، ئەمە كۆتا ئۆفەرە كە ریال مەدرید پێشكەشی ئەستێرەكەی هەڵبژاردەی فەڕەنسای دەكات، ئەگەر دوای بخەن ئەوا جارێكی دیكە دانوستانی لەگەڵ ناكەنەوە.
گرێبەستەكەی ئێمباپێ لەگەڵ پاریس سانجێرمان لە 30 حوزەیراندا بەسەردەچێت و لە بەرواری 1 كانونی دووەمەوە هەر یانەیەك بیەوێت دەتوانێت گفتوگۆ لەگەڵ یاریزانەكە بە بێ رەزامەندی یانەكەی بكات.
لە 22 یاری ئەم وەرزەدا كیلیان ئێمباپێ توانیویەتی 21 گۆڵ بكات و دوو گۆڵیش درووست بكات.
