یاریگا
هەمووان لە یانەی پاریس سانجێرمان گومانیان لە داهاتووی کلیان ئێمباپێ هێرشبەری یانەکەیان هەیە، بۆیە بەرپرسانی یانەکە ماوەیەکە بە دوای شوێنگرەوەی دەگەڕێن.
گۆڵکارە فەرەنسیەکە چەند ساڵێکە هەوڵی جیابونەوە لە یانەکەی دەدات، بەڵام لە کۆتاییدا بڕیاری مانەوە لە یانەکەی دەدات، بەڵام پێدەچێت هاوینی داهاتوو بە یەکجاری یانەکەی جێبێڵێت.
ماڵپەری 90min بڵاویکردەوە بەرپرسانی یانە شازادەکە خڤیچا کڤارا هێرشبەری جۆرجی یانەی ناپۆلی ئیتاڵیایان کردووەتەوە ئامانج و دەیانەوێت وەکو شوێنگرەوەی کلیان ئێمباپێ هاوینی داهاتوو بۆ ریزەکانیان بگوازنەوە.
ئێمباپێ تاوەکو هاوینی ساڵی 2024 گرێبەستی لەگەڵ پاریس سانجێرمان هەیە و تاوەکو ئێستا ئامادەنیە گرێبەستەکەی نوێ بکاتەوە. دەنگۆیەکیش هەیە پەیوەندی بە ریزەکانی یانەی ریال مەدریدی ئیسپانیاوە بکات.
لەلایەکی دیکەوە چەند هەفتەیەک لەمەوبەر، یانەی ریال مەدریدی ئیسپانیا، بە فەرمی رەتیکردەوە هەوڵ بۆ گواستنەوەی هێرشبەرەکەی پاریس سانجێرمان بدەن.
