قوە جەویە و سێپاهان یەکسانبوون

یاریگا

لە گەڕی یەکەمی قۆناغی کۆمەڵەکانی چامپیۆنزلیگی ئاسیا، یانەی قوە جەویەی عێراقی لە یاریگای شەهید فەرەنسۆ هەریری میوانداری یانەی سێپاهانی ئێرانی کرد.

دوای تێپەڕبوونی 26 خولەک بەسەر یارییەکە، عەلی جاسم سوودی لە ئاسیستێکی ئاتچۆ بینی و توانی گۆڵی یەکەم بۆ یانە عێراقیەکە بکات.

چوار خولەک بەسەر گۆڵەکەی جەویە تێپەڕی کرد، یاریزانانی سێپاهان توانیان لە رێگەی محەمەد دانێشفەر ئەنجامی یارییەکە یەکسان بکەنەوە و نیوەی یەکەمیش بەم ئەنجامە کۆتایی هات.

نیوەی دووەم یاریزانانی میوان دەستپێشخەریان کرد و لە خولەکی 67 محەمەد قوربانی توانی گۆڵی دووەم بۆ یانەکەی بکات.

پێشکۆتایی هاتنی یارییەکە و لە خولەکی 88 عەلی جاسم جارێکی دیکە تۆڕی گۆڵی سێپاهانی هەژاندەوە و یارییەکەش بە ئەنجامی 2-2 کۆتایی هات.