دوایین پێشهاتی کەیسی گواستنەوەی محەمەد سەڵاح بۆ ئیتیحاد

یاریگا –

محەمەد سەڵاح، ئەستێرەی یەکەمی لیڤەرپوول بووەتە ئامانجی سەرەکی ئیتیحادی سعودی.

ئیتیحاد دەیەوێت لەم چەند رۆژەی مێرکاتۆی هاوینەی کە ماوە، هەوڵی دەستپێکردنی گفتوگۆکان لەگەڵ لیڤەرپوول بدات، ئەمەش دوای گواستنەوەی فابینیۆ، ئێنگۆلۆ کانتێ و کەریم بێنزێما.

کەناڵی ریازییە بڵاویکردووتەوە، لیڤەرپوول هەوڵەکانی رابردووی ئیتیحادی رەتکردبووەوە، بەڵام ئێستا پارەیەکی زیاتریان خستووەتە بەردەم لیڤەرپوول، تاوەکو رای بگۆڕێت.

یاریزانی نێودەوڵەتی 31 ساڵان، پێشتر نیازی جێهێشتنی لیڤەرپوولی رەتکردبووەوە و گرێبەستی تاوەکو هاوینی 2025 لەگەڵ یانەکەی مێرسیساید بەردەوامە. ئیتیحاد دەیەوێت بۆ مۆندیالی یانەکان، تیمێکی بەهێز ئامادە بکات و نازناوەکە بباتەوە، بۆیە چاوی بڕیوەتە محەمەد سەڵاح.

سەڵاح شەش ساڵی سەرسووڕهێنەری لەگەڵ لیڤەرپوول بەڕێکرد و دەیان ریکۆردی شکاند. تاوەکو ئێستا لە کۆی 307 یاریدا، 187 گۆڵی کردووە و نازناوەکانی چامپیۆنزلیگ، پرێمەرلیگ، جامی سوپەر، جامی جیهانی، جامی یەکێتیی ئینگلتەرا، جامی کاراباو و قەڵخانی ئینگلتەرای بردەوە.