بەرگریکارێکی بارسا پەیوەندی بە نەسڕەکەی رۆناڵدۆوە دەکات

یاریگا-یانەی نەسڕی سعوودی سەرقاڵی گواستنەوەی کلیمێنت لینگلێی بەرگریکاری بارسێلۆنایە.

بەگوێرەی هەواڵێکی موندۆ دیپۆرتیڤۆ، بارسا لە هەوڵدایە چەند یاریزانێکی بفرۆشێت و یەکێک لەو یاریزانە لینگلێی فەڕەنسییە کە وەرزی رابردووی بە خواستن لە تۆتنهام بەسەربرد.

بەگووتەی سەرچاوەکە تۆتنهام دەیەوێت ئەو یاریزانە بەگرێبەستێکی هەمیشەیی بگەڕێنێتەوە بەڵام هەموو پێشهاتەکان بەرەو ئەوە دەچن ببێتە نوێترین یاریزانی خولی سعوودی. چاوەڕوانناکرێت بارسا داوای پارەیەکی زۆر بکات و تەنها مەبەستییەتی مووچەی ئەو یاریزانە لە ئەستۆی خۆی لاببات.

جگە لە لینگلێ، چاوەڕواندەکرێت هەریەک لە فرانک کیسێ و عوسمان دێمبێلێ بەهەمان شێوە یانەکە جێبهێڵن.