شورتە گەیشتە قۆناغی دووەمی جامی شا سەلمان
یاریگا
یانەی شورتەی عێراق گەیشتە قۆناغی چارەکی کۆتایی جامی شا سەلمان لە سعودیە، هەرچەندە بەرامبەر یانەی ئیتیحادی سعودی تووشی شکست بوو.
لە کۆتا یاریی قۆناغی یەکەمی جامی شا سەلمان، یانەی شورتە نوێنەری عێراق لە پاڵەوانتیەکە رووبەڕووی یانەی ئیتیحادی سعودیە بوو و یارییەکەی بە ئەنجامی گۆڵێک بەرامبەر دوو گۆڵ دۆڕا.
لەم یارییە کەریم بینزیما گۆڵکاری فەرەنسی یانەی سعودی پاش هاتنە ناو یاریگا توانی لە خولەکی 84 بە لێدانی پێناڵتی گۆڵی دووەم و بردنەوە یانەکەی بکات.
بینزیما لەم پاڵەوانتیە لە کۆی سێ یاریی خاوەنی سێ گۆڵە و هاوشان لەگەڵ چوار یاریزانی دیکە گۆڵکاری جامەکەن.
بەم ئەنجامە لە کۆمەڵەی یەکەمی جامی شا سەلمان ئیتیحاد وەکو پێشەنگ سەرکەوت بۆ قۆناغی چارەکی کۆتایی و شورتەش وەکو تیپی دووەم.
لە قۆناغی چارەکی کۆتایی شەممەی داهاتوو کەریم بینزیما و هاوڕێیەکانی بەرامبەر یانەی هیلال یاری دەکەن، شورتە لە هەمان رۆژ بەرامبەر یانە سەدی قەتەر یاری دەکات.
