دوو یانەی پرێمەرلیگ هەنگاوی کرداری بۆ ئێمباپێ دەنێن

یاریگا –

ئارسیناڵ ئامادەکاری بۆ پێشکەش کردنی ئۆفەرێی گەورە بە کیلیان ئێمباپێ دەکات.

هەنگاوی یەکەمی گواستنەوەی ئێمباپێ بە فرۆشتنی گابریێل مارتینێلی دەست پێدەکات. پێگەی فووتبۆڵ ترانسفێرس بڵاویکردووەتەوە، ئارسیناڵ کێبڕکێ لەگەڵ چێڵسی دەکات و دەیەوێت زووتر ئۆفەرەکەی ئامادە بکات، بەڵام ئەمەش پێویستی بە فرۆشتنی یاریزانێکی وەک مارتینێلییە، تاوەکو پارەی پێویست دابین بکات.

ئێمباپێ ئێستا لەلایەن پاریس سانجێرمان نیمچە سڕ کراوە، روون نییە چارەنووسی چی دەبێت، چونکە پاریس دەیەوێت گرێبەستەکەی نوێ بکاتەوە و ئێمباپێش تاوەکو ئێستا رازی نییە لە پاریس بمێنێتەوە و دەیەوێت لە هاوینی داهاتوودا لە گرێبەستێکی ئازاد، ریزی یانەکە جێبهێڵێت.

ریال مەدرید نزیکترین یانەیە لە ئێمباپێ، بەڵام مەدریدییەکان نایانەوێت هیچ بڕە پارەیەک بۆ گواستنەوەی خەرج بکەن، چونکە گرێبەستەکەی لە هاوینی داهاتوو بەسەر دەچێت. هەندێ راپۆرت باس لە رێککەوتنی سەرەتایی نێوان مەدرید و ئێمباپێ دەکەن.

هەرچەندە ئەرکەکەی ئارسیناڵ ئاسان نییە، بەڵام یانە لەندەنییەکە دەیەوێت سوود لە دەرفەتەکە وەربگرێت و هەوڵی تەواوی خۆی بدات.