گواستنەوەی کیلیان ئێمباپێ ”مەحاڵە”

یاریگا –

کیلیان ئێمباپێ داوای ئۆفەرێکی گەورە لەو یانەیە دەکات، کە بە نیازە لە پاریس سانجێرمان بیگوازێتەوە.

بۆ سیێەم مێرکاتۆی هاوینەیە لەسەریەک، داهاتووی کیلیان ئێمباپێ دەبێتە بابەتی گەرمی میدیاکان، ئەم هاوینەش ناوی ئێمباپێ بە ریال مەدرید بەستراوەتەوە، رۆژنامەی مارکا بلڵویکردووەتەوە، ئێمباپێ ساڵانە داوای 240 ملیۆن یۆرۆ دەکات، ئەگەر بێتو لەم هاوینەدا ریزەکانی پاریس سانچێرمان جێبهێڵێت.

هەرچەندە لیڤەرپوولیش داوای ئێمباپێ دەکات، بەڵام پێناچێت لیڤەرپوول بتوانێت ئەو بڕە پارەیە دابین بکات، بە تایبەت بۆ وەرزی داهاتووش بەشداری لە چامپیۆنزلیگ ناکات.

چیرۆکی ریال مەدرید و ئێمباپێ دوور و درێژە، وەرزی رابردوو ئەستێرەکەی هەڵبژاردەی فەرەنسا چەند هەنگاوێک لە ریال مەدرید نزیکبوو، بەڵام پاریس سانجێرمان ئۆفەرێکی گەورەی خستە بەردەم کیلیان، ناچاربوو گرێبەستەکەی تاوەکو ساڵی 2025 نوێ بکاتەوە، بەڵام بەو مەرجەی لە ساڵی 2024 کیلیان بڕیار لەسەر درێژکردنەوەی گرێبەستەکەی بۆ ساڵێک بدات.

سیناریۆییەکە بەم شێوەیە، ئەگەر ئێمباپێ بڕیاری مانەوە بدات، ئەوا لە سەرەتای ساڵی داهاتوو، دەتوانێت لەگەڵ هەر یانەیەک لەسەر مەرجەکانی کەسی رێکبکەوێت و دواتر لە هاویندا بە خۆڕایی پەیوەندی بەو یانەیەوە بکات.

رۆژنامەی مارکا دەڵێت، ریال مەدرید 113 ملیۆن پاوەندی لە پێناو گواستنەوەی جود بێڵینگهام خەرج کردووە و ناتوانێت ئێمباپێ بەو بڕە پارەی کە داواکراوە، بگوازێتەوە.