ریال مەدرید بڕیاری کۆتایی لەبارەی ئێمباپێ دا
یاریگا –
چیرۆکی گواستنەوەی کیلیان ئێمباپێ، ئەستێرەی پاریس سانجێرمان بۆ ریال مەدرید خەریکە دەگاتە بنبەست.
پێدەچێت، کاپتنەکەی هەڵبژاردەی فەرەنسا وەرزێکی دیکەش لە قەڵای پاریس بمێنێتەوە، سەرەڕای زۆربوونی دەنگۆکانی گواستنەوەی بۆ ریال مەدرید، تەنانەت گواستنەوەی لەم مێرکاتۆیەدا بۆ مەدرید بە مەحاڵ وەسف دەکرێت.
No os hagáis líos. Tranquilidad absoluta en el @realmadrid
— José Félix Díaz (@jfelixdiaz) June 30, 2023
خۆسێ فێلیکس دیاز، رۆژنامەنووسی دیاری رۆژنامەی مارکا لە تویتێکدا روونیکردووەتەوە، ئێمباپێ نایەوێت دەستبەرداری ئەو شیرینییە (پارەی شیرینی) بێت کە بڕیارە ئەم وەرزە لەگەڵ پاریس وەریبگرێت.
لە لایەکی دیکەوە، پاریس سانجێرمان سوورە لەسەر ئەوەی، رێگە نادەن ئێمباپێ بە خۆڕایی ریزەکانی شازادەکانی پاریس جێبهێڵێت، ئەمەش هاوکێشەکەی زیاتر ئاڵۆز کردووە.
رۆژنامەنووسەکە دەڵێت، لە ریال مەدرید گەیشتوونەتە ئەو بڕوایەی، ئیتر ناتوانن لەم هاوینەدا گرێبەست لەگەڵ ئێمباپێ بکەن و پرسەکەیان داخستووە.
پاریس هەموو هەوڵێک بۆ هێشتنەوە و نوێکردنەوەی گرێبەستی ئێمباپێ دەدات، بە تایبەت دوای گرێبەست کردنیان لەگەڵ لویس ئێنریکێ، راهێنەری پێشووی بارسێلۆنا.
ریال مەدرید لە مێرکاتۆی ئەم هاوینەدا، گرێبەستی لەگەڵ فران گارسیا، خۆسێلو و جود بێڵینگهام واژۆ کردووە، ئەمە جیا لە گەڕانەوەی ئیبراهیم دیاز کە بە خواستن یاری بۆ میلان دەکرد.
