گۆڵ بە گۆڵی کاروانە وەرزشییە پڕ سەروەرییەکەی کەریم بێنزێما

یاریگا –

کەریم بێنزێما، هێرشبەری ریال مەدرید بە یەکێک لە باشترین هێرشبەرانی مێژووی ریال مەدرید و هەڵبژاردەی فەرەنسا دادەندرێت.

لە چەند ساڵی رابردوودا، بێنزێما توانی شوێنپەنجەی خۆی لەگەڵ ریال مەدرید بەڕوونی دیار بکات و ئەمەش وایکرد، خەڵاتی باڵۆن دۆر بباتەوە. بردنەوەی خەڵاتەکە باڵا دەستی بێنزێمای دووپاتکردەوە.

لە 10 ساڵی رابردوودا، بێنزێما ئاستێکی جێگیری لەگەڵ ریال مەدرید پێشکەش کردووە، هەرچەندە بە هۆی کریستیانۆ رۆناڵدۆوە، کەریم بە تەواوی نەبووە ئەستێرەی یەکەمی لۆس بلانکۆس، بەڵام لەدوای چوونە دەرەوەی رۆناڵدۆ، بێنزێما خۆی وەک ئەستێرەی یەکەم و کاپتنی ریال پیشاندا.

کەریم بە فینیشینگ یاخود دوا بەرکەوتنی تۆپ لە بەرامبەر رکابەرانیدا بەناوبانگە. جیا لەمە بێنزێما رۆڵی دروستکەری یاریش دەگێڕێت و لەگەڵ کریستیانۆ رۆناڵدۆ، بەڕوونی ئەسیستکاری بێنزێما دەرکەوت. بەڵام رۆناڵدۆ بە هۆکاری جیاوازەوە، سەرنجی میدیاکانی بۆ خۆی راکێشابوو.

یاریگا لەم بابەتەدا، کە بەردەوام نوێی دەکاتەوە، سەرنج لەسەر ئامارەکانی کەریم دادەنێت و ئەپدەیتیان دەکاتەوە.

با بزانین، کەریم چەند گۆڵی لە کاروانی وەرزشی خۆیدا کردووە؟

گۆڵەکانی کەریم بێنزێما لەگەڵ ریال مەدرید

کەریم بێنزێما لە ساڵی 2009 بە بڕی 35 ملیۆن یۆرۆ لە یانەی ئۆڵێمپیک لیۆنەوە پەیوەندی بە ریال مەدرید کرد. هەرچەندە دەستپێکی کەریم لەگەڵ لۆس بلانکۆس لە ئاستی پێویستدا نەبوو. چونکە لە یەکەم وەرزیدا، تەنیا 9 گۆڵی لە کۆی 33 یاریدا کرد.

بێنزێما دواتر لەگەڵ کریستیانۆ رۆناڵدۆ و گارێس بەیڵ، یەکێک لە مەترسیدارترین سێیانەی هێرشبەری جیهانی پێکهێنا. هەرچەندە بێنزێما رۆڵی هاوکاری زۆری بۆ دوو ئەستێرەکەی دیکە دەگێڕا، بەڵام هەر توانی ناوی خۆی بە پیتی زێڕین لە مێژووی ریال مەدرید بنووسێتەوە.

گۆڵکارانی مێژوویی لالیگا

گۆڵەکانی کەریم بێنزێما لەگەڵ ئۆڵێمپیک لیۆن

بێنزێما کاروانی وەرزشی لەگەڵ یانەی برۆن دەستپێکرد و لە ساڵی 1997 پەیوەندی بە لیۆن کرد. لەگەڵ ئەو یانەیە قۆناخی جیاوازی بەڕێکرد و لە ساڵی 2005 گەیشتە هێڵی یەکەمی یانە فەرەنسییەکە.

لە یەکەم یاریدا، بێنزێما گۆڵی دووەمی لیۆنی دروستکرد، هەر ئەمەش بووە هۆکاری واژۆکردنی گرێبەستێکی درێژ مەودا لەگەڵ یاریزانە فەرەنسییەکە.

بێنزێما لەگەڵ لیۆن 148 یاری کرد و 66 گۆڵیشی تۆمار کرد. دواتر بێنزێما بووە خاوەن بەرزترین مووچە لە مێژووی خولی فەرەنسیدا، کاتێک گرێبەستەکەی لە هاوینی ساڵی 2008 نوێکردەوە.

کەریم بێنزێما لەگەڵ هەڵبژاردەی فەرەنسا

هەرچەندە کاروانی بێنزێما لەگەڵ هەڵبژاردەی فەرەنسا زۆر بەرز و نزمی بەخۆیەوە بینی، بەڵام بێنزێما خۆی وەک یەکێک لە باشترین هێرشبەرانی مێژووی فەرەنسا سەپاندووە.

لە ساڵی 2006، بەر لەوەی یاری بۆ هەڵبژاردەی فەرەنسا بکات، لە لێدوانێکی رۆژنامەوانیدا حەزی خۆی بۆ یاریکردن بۆ هەڵبژاردەی جەزائیر راگەیاند، ئەو وڵاتەی کە وڵاتی دایک و باوکییەتی. بەڵام بە هۆکاری وەرزشییەوە، بڕیاریدا یاری بۆ هەڵبژاردەی فەرەنسا بکات.

لە ساڵی 2015, نۆیێل لۆ گرایت، سەرۆکی یەکێتیی تۆپی پێی فەرەنسا بڕیاریدا، کەریم بێنزێما لە ریزەکانی هەڵبژاردەی کەڵەشێرەکان دووربخاتەوە، دوای تێوەگلانی لە کێشە دروستکردن بۆ ماتیۆ ڤالبوێنا، هاوتیمەکەی.

لە ساڵانی نێوان 2016-2020 هیچ یارییەکی بۆ هەڵبژاردەی فەرەنسا نەکرد، بەڵام لە ساڵی 2021 لەلایەن دیدیێ دیشان، بانگهێشتی هەڵبژاردەی فەرەنسا کرایەوە.

لەگەڵ هەڵبژاردەی فەرەنسا، کەریم نازناوی نەیشنس لیگی بردەوە، بەڵام بە هۆی پێکان، نەیتوانی بەشداری لە مۆندیالی 2022دا بکات و دواتر وازی لە یاری نێودەوڵەتی هێنا.

کۆی گشتی گۆڵەکانی بێنزێما