بارسێلۆنا و پاریس سانجێرمان کێبڕکێی لەسەر گواستنەوەی سیلڤا دەکەن

یاریگا–
ماوەیەکە دەنگۆیەکی بەهێز بڵاوبووەتەوە گوایە یانەی بارسێلۆنا دەیەوێت بیرناردۆ سیلڤا ناوەڕاستکاری پۆرتوگاڵی یانەی مانچێستەر سیتی بۆ ریزەکانی بگوازێتەوە و ئێستاش دەنگۆی ئەوە بڵاوبووەتەوە کە یانەی پاریس سانجێرمانی فەرەنسی بۆ گواستنەوەی یاریزانە هاتووەتە سەرهێڵ.

ماڵپەری Le10sportـی فەرەنسی بڵاویکردەوە، کارگێری شازادەکان هاتونەتە نێو ململانێ گواستنەوەی ناوەڕاستکاری پۆرتوگاڵیەکەی ستیزن و ئامادەن ئەم هاوینە یاریزانەکە بۆ ریزەکانیان بگوازنەوە، بۆیە چاوەڕێ دەکرێت ئەو یاریزانە لە نێوان بلاوگرانا و شازادەکان وەرزی داهاتوو درێسی یەکێک لەو دوو یانەیە لەبەر بکات.

لەلایەکی دیکەوە سەرچاوەکانی ئینگڵتەڕاش باس لەوە دەکەن، یانەی مانچێستەر سیتی ئامادەنیە بە کەمتر لە 80 ملیۆن یۆرۆ دەستبەرداری یاریزانەکەی بێت.