ئارسیناڵ ئۆفەرێکی خەیاڵی ئامادە کردووە؛ چاوەڕێی شکستهێنانی پەیوەندیکردنی ئالڤارێز بە بارسێلۆنا دەکات
گەنەرز بۆ خولیان لە بۆسەدایە
یاریگا –
ئارسیناڵ بۆ گواستنەوەی خولیان ئالڤارێز پەیڕەوی ستراتیژییەکی زۆر روون دەکات ؛ چاوەڕێ دەکات یاریزانەکە بێهیوا بێت لە هەوڵەکانی بۆ پەیوەندیکردن بە یانەی بارسێلۆنا، بۆ ئەوەی دواتر خۆی وەکوو رزگارکەرێک دەربخات تاوەکوو یاریزانەکە لە ئاتلێتیکۆ مەدرید بباتە دەرەوە.
رۆژنامەی تایمز بڵاویکردووەتەوە، ئارسیناڵ هیوایەکی زۆری هەیە کە ئاتلێتیکۆ مەدرید لە رێگریکردن لە گواستنەوەی خولیان بۆ بارسێلۆنا بەردەوام بێت و پێشوەختە پێشنیارێکیان خستووەتە بەردەم یاریزانەکە و ئاتلێتیکۆ تاوەکوو لە مانگی ئاب گرێبەستێکی خێرا واژۆ بکەن.
هەموو شتێک پشت بە ئارامگریی یاریزانە ئەرجەنتینییەکە دەبەستێت کە ئامادەیە جەنگێک لەگەڵ یانەکەی دروست بکات بۆ ئەوەی رازییان بکات دانوستان لەگەڵ بارسێلۆنا بکەن یان نا.
🛡️El Arsenal espera que el Atlético bloquee el fichaje de Julián por el Barça
✍️ L.Miguelsanzhttps://t.co/ieA7DVBG6B
— Diario SPORT (@sport) July 24, 2026
خەونی بلاوگرانا و هەوڵەکانی ئارتێتا
تاوەکوو ئێستا، یانە ئینگلیزییەکە نەیتوانیوە ئالڤارێز رازی بکات تەنانەت گوێ لە پێشنیارەکەیان بگرێت، ئەو یاریزانەی کە ئارتێتا بۆ دووبارە داڕشتنەوەی هێڵی هێرشبەری پڕۆژە نوێیەکەی دیاریکردووە، تاوەکوو ئێستا نە بە پەیوەندییە تەلەفۆنییەکانی ئارتێتا و نە بە هەوڵەکانی بەڕێوەبەری وەرزشی رازی نەبووە دەستبەرداری خەونەکەی بێت بۆ پۆشینی درێسی بارسا.
سەرەڕای ئەوەی ئارسیناڵ پێشبینی ئەم دۆخەی دەکرد، بەڵام هێشتا نایانەوێت بیر لە جێگرەوەی دیکە بکەنەوە، چونکە دڵنیان لەوەی لە کۆتاییدا دەتوانن ئەم یاریزانە بەدەستبهێنن.
پێشنیارە خەیاڵییەکەی گەنەرز
پێشنیارەکەی ئارسیناڵ بریتییە لە پێدانی ڤیکتۆر یۆکێرێس، ئەو هێرشبەرەی هاوینی رابردوو بە 64 ملیۆن یۆرۆ گواستیانەوە و تاوەکوو ئێستا بەتەواوی لەگەڵ تیمەکەدا نەگونجاوە، کە بەهای ئێستای زیاترە لە 50 ملیۆن یۆرۆ، سەرباری ئەوەش بڕە پارەیەکی کاش دەدەنە ئاتلێتیکۆ کە دەگاتە نزیکەی 100 ملیۆن یۆرۆ؛ ئەم پێشنیارە لەوانەیە بۆ رۆخی بلانکۆس زۆر سەرنجڕاکێش بێت، بەتایبەت کە هێرشبەرە سویدییەکە یاریزانێکی دڵخوازی دیێگۆ سیمیۆنییە.
دوا وادە و چاوەڕوانییەکان
ئێستا ئارسیناڵ بڕیاری داوە نەچێتە نێو زیادکردنەکەوە تاوەکوو کەسە نزیکەکانی یاریزانەکە گڵۆپی سەوزیان بۆ هەڵ نەکەن بۆ دەستپێکردنی دانوستانەکان، کە ئەمەش پێناچێت لە ماوەیەکی نزیکدا رووبدات.
بیرۆکەی یاریزانەکە تەنیا یاریکردنە بۆ بارسا و دەبێت چاوەڕێ بکەین بزانین جارێکی دیکە فشار دەخاتەوە سەر ئاتلێتیکۆ یان نا. چاوەڕوانییەکی زۆر هەیە کە ئالڤارێز بێتە دەنگ و بە ئاشکرا رایبگەیەنێت کە دەیەوێت درێسی بلاوگرانا بپۆشێت.
بۆ ئێستا، ئاتلێتیکۆ مەدرید خولیانی کردووە بۆ کەمپی مەشقەکانی ئامادەکاریی پێش وەرز لە 10ـی ئاب بانگهێشت کردووە و هیچ ئاماژەیەک نییە کە یاریزانەکە یاخی بێت، بەڵام دەیەوێت لەگەڵ بەرپرسانی یانە مەدریدییەکە قسە بکات بۆ ئەوەی دەرگای دانوستان لەگەڵ بارسیلۆنا بکەنەوە.
لە لایەکی دیکەشەوە، بارسێلۆنا جەخت لەوە دەکاتەوە کە ئەو پێشنیارەی پێشکەشیان کردووە جێگیرە و ناگۆڕێت و وادەی بەسەرچوونیشی هەیە؛ وادەکە نزیک دەبێتەوە و تاوەکوو ئێستاش ئاتلێتیکۆ وەڵامی نەداونەتەوە.
