مێرکاتۆی تۆتنهام؛ بە دوای چ پێگەیەک دەگەڕێن، بەربژێرەکان کێن و کام یاریزانانە دەڕۆن؟

یاریگا – ئاتلێتیک

تۆتنهام تاینان تۆمپسن، باڵی چەپی هێرشبەری تەمەن 18 ساڵی بە بڕی دەستپێکی چوار ملیۆن پاوەند فرۆشتە مانچێستەر یونایتد، کە بەگوێرەی پێشکەوتنی لە ئۆڵد ترافۆرددا دەکرێت بۆ هەشت ملیۆن پاوەند بەرز بێتەوە.

تۆمپسن بەشێک بوو لە کۆمەڵە لاوێکی سەرنجڕاکێش لە هۆتسپێر وەی، لەگەڵ لوکا ویلیامز-بارنێت و جونای بایفیڵد، بەڵام تۆمپسن و خێزانەکەی بەهۆی بارودۆخی خێزانییەوە ئارەزووی گواستنەوەیان لە لەندەنەوە هەبوو. تۆتنهام مافی رێژەیەک لە فرۆشتنەوە لەپاڵ مافی بەراوردکردنی ئۆفەرەکانی پاراستووە ئەگەر لە داهاتوودا لە یونایتد بڕوات.

سپێرز هەروەها ئۆفەرێکی 46 ملیۆن پاوەندیی نیوکاسڵ یونایتدی بۆ بێرگڤاڵی یاریزانی هێڵی ناوەڕاست رەت کردووەتەوە. یاریزانە تەمەن 20 ساڵەکە هەروەها بووەتە ئامانجی ئۆفەرەکانی نۆتینگام فۆڕێست، کە وەکوو جێگرەوەیەک بۆ ئاندێرسن سەیری یاریزانە نێودەوڵەتییە سویدییەکە دەکەن.

هەست بەوە دەکرێت بێرگڤاڵ بڕوات؟

فۆڕێست و نیوکاسڵ ئارەزووی بێرگڤاڵ دەکەن، کە وەرزی رابردوو لەژێر دەستی رۆبێرتۆ دێ زێربیدا خۆی لە دەرەوەی پلانە سەرەکییەکاندا بینییەوە. بێرگڤاڵ بە تۆتنهامی گوتووە کە دەیەوێت بەدوای ئاڵەنگارییەکی نوێدا بگەڕێت و یانەکەش ئامادە دەبێت بۆ جیاوبوونەوە لەگەڵیدا ئەگەر یانەیەک لە نرخەکەیان نزیک بێتەوە.

تۆتنهام هیچ نرخێکی داواکراوی بۆ بێرگڤاڵ دیاری نەکردووە، هەرچەندە دەیڤد ئۆرنشتاین لە پۆدکاستی ‘ئاتلێتیک ئێف سی’دا گوتی یانەکان پێیان وایە یانەکەی باکووری لەندەن داوای ژمارەیەکی نزیک لە 60 ملیۆن پاوەند دەکات.

کام یاریزانانە ئەگەری رۆیشتنیان هەیە؟

تۆتنهام بەردەوامە لە گرنگیدان بە باڵی چەپی هێرشبەر و ساڤینیۆ لەنێو ئەو ناوانەدایە کە لە لیستی ئەواندان. سپێرز هاوینی رابردوو چەندین ئۆفەری بۆ یاریزانە نێودەوڵەتییە بەڕازیلییەکە پێشکەشی مانچێستەر سیتی کرد بەڵام نەیتوانی گرێبەستەکە یەکلایی بکاتەوە. یاریزانە تەمەن 22 ساڵەکە لەژێر دەستی پێپ گواردیۆلادا بە بەردەوامی لە پێکهاتەی سیتی سەقامگیر نەبوو و تۆتنهام ئارەزووی خۆی بۆی دەپارێزێت.

بەڵام تەنیا لە باڵی چەپدا نییە کە تۆتنهام بەدوای بەهێزکردندا دەگەڕێت؛ ئەوان لە سەرانسەری هێڵی هێرشبەریی کەموکوڕیان هەیە. سپێرز پێویستی بە هێرشبەرێکی نووکی دیکە دەبێت، بەتایبەتی ئەگەر ریچارلسن بڕوات. هەروەها کەمیی بژاردە لە باڵی راستی هێرشبەریدا هەیە، لە کاتێکدا تەنیا دوو باڵی راستی سروشتی هەن؛ یەکێکیان دێیان کولوسێڤسکییە کە زیاتر لە ساڵێکە تووشی پێکان بووە و ئەوی دیکەشیان محەمەد قدووسە کە لە کانوونی دووەمدا بەهۆی پێکانی رانەوە دوورکەوتەوە.

چ یاریزانێک دەکرێت یانەکە جێبهێڵێت؟

چاوەڕوان دەکرێت کریستیان رۆمێرۆ و گێلێمۆ ڤیکاریۆ هەردووکیان لەم هاوینەدا یانەکە جێبهێڵن. رۆمێرۆ لە دڵی بەرگریدا بۆ ئەرجەنتین دەستی پێ کرد لە دۆڕانیان بە ئەنجامی 1 – 0 دوای کاتی زیادکراو بەرامبەر ئیسپانیا لە یاریی کۆتایی مۆندیالدا، بەڵام لە خولەکی 70 بەهۆی پێکانەوە گۆڕانکاریی پێ کراوە.

لە هێڵی هێرشبەریدا، مایکی موور دەکرێت بە خواستن بڕوات، لە کاتێکدا سپێرز ئامادەیە گوێ بۆ ئۆفەرەکانی ریچارلیسن بگرێت.