یاریگا –
دوای ئەوەی رۆژێک پێشتر ئەو نهێنییە ئاشکرایەی پشتڕاست کردەوە کە لەگەڵ ریال مەدرید بەردەوام نابێت، ئالڤارۆ ئاربێلوا توانی بە بردنەوەیەکی قایلکەری 4-2 بەسەر ئاتلێتیک بلباو، ماڵاوایی لە بێرنابیۆ بکات.
راهێنەرەکە لە لایەن بەشێک لە هاندەرانی بێرنابیۆوە خۆشەویستیی پێبەخشرا، بەڵام لە لایەن بەشەکانی دیکەشەوە فیکەی ناڕەزایەتی لێدرا. ئەوەی روون بوو، ئەو بە پاڵپشتیی ژووری خۆگۆڕینەوە یانەکە جێدەهێڵێت، لەوانەش باوەشێکی کیلیان ئێمباپێ دوای گۆڵەکەی ئەو یاریزانە فەرەنسییە کە وا دەردەکەوت ئاماژەیەک بێت بۆ ئاشتی لەنێوان هەردووکیاندا.
سوپڕایزەکە لەگەڵ کۆتاییهاتنی یارییەکەدا هات. راهێنەرەکە بە ئاستەم چووە پێشەوە و بە فەرمی ماڵاوایی لە هاندەرانی ریال مەدرید نەکرد. چەند وێنەیەکی لەگەڵ پێکهاتەکەدا گرت، بەڵام هەمیشە لە پشتەوەی دیمەنەکەدا دەردەکەوت.
سەرنجڕاکێشترین سات لە ژووری رۆژنامەوانیدا روویدا. کاتێک کۆنگرەی رۆژنامەوانیی ئێرنێستۆ ڤاڵڤێردی کۆتایی هات، زاندرا کە ئالڤارۆ ئاربێلوا لە بەردەم میدیاکاندا دەرناکەوێت. ئەمە دۆخێکی تەواو نائاساییە و تاوەکوو ئێستا هیچ روونکردنەوەیەکی فەرمی لە لایەن یانەکەوە لەو بارەیەوە نەدراوە.
بە کورتی، بڕیار بوو ئەمە دوایین کۆنگرەی رۆژنامەوانیی راهێنەرەکە بێت وەکوو راهێنەری ریال مەدرید، پێش ئەوەی رۆیشتنی ئەو و گەیشتنی جۆزێ مۆرینیۆ، کە شوێنی لە راهێنەرایەتی دەگرێتەوە، بە فەرمی رابگەیەنرێت.
ئەو پرسیارانەی بێ وەڵام مانەوە
بەم شێوەیە، ئاربێلوا لە دوایین رۆژیدا خۆی لە وەڵامدانەوەی پرسیارە بێزارکەرەکان بەدوور گرت، وەکوو ئەو پرسیارانەی کە تایبەت بوون بە پەیوەندیی ئەو لەگەڵ یاریزانانی وەکوو؛ کیلیان ئێمباپێ، دانی کارڤاخال یان دانی سیبایۆس، کە ئەمەی دواییان لە کۆتاییدا خولەکی یاریکردنی پێدرا سەرەڕای ئەو لێکدانەوانەی کە دەیانگوت تەنانەت لە پێکهاتەی یارییەکەشدا نابێت.
هێشتا دیار نییە کە ئایا راهێنەرەکەی ئێستای ریال مەدرید لە رێگەی بەیاننامەیەکەوە لە هەژمارە تایبەتەکانی خۆی لە تۆڕە کۆمەڵایەتییەکان یان بە شێوازێکی دیکە ماڵاوایی دەکات. ئەوەی روونە و لە لایەن خودی ئاربێلواوە پشتڕاست کراوەتەوە، ئەوەیە کە لەگەڵ یانەکەدا بەردەوام نابێت، نە وەکوو راهێنەری سەرەکی و نە وەکوو بەشێک لە تیمی نوێی راهێنەرایەتی کە دێتە نێو پێکهاتەی مەدریدەوە.
