یاریگا –
رەفتارەکەی ڤینیسیۆس جونیۆر زریانێکی لەنێو جەرگەی قەڵای شاهانە دروستکرد، کە دوای کلاسیکۆی قۆناخی یەکەم بە جیاوازی حەوت خاڵ لەپێش یانە کاتالوونییەکەوە بوون.
زیاتر لە شەش مانگ تێپەڕیوە، بەڵام هێشتا لەنێو ریال مەدرید هەست بە هەموو ئەو تووڕەییە دەکرێت کە ڤینیسیۆس دروستی کرد، کاتێک لەلایەن چابی ئالۆنسۆوە لە کلاسیکۆی قۆناخی چووندا گۆڕانکاری پێکرا. لە ناوەڕاستی گێمی دووەمی یارییەکەدا، کە ئەنجامەکە 2-1 بوو و هەر بەو شێوەیەش کۆتایی هات، بەمەش مەدرید جیاوازییەکەی لەگەڵ بارسێلۆنا کردە حەوت خاڵ، راهێنەرە تۆلۆساییەکە بڕیاریدا یاریزانە بەڕازیلییەکە لە یاریگا بهێنێتە دەرەوە و ئەویش ئەمەی بە باشی وەرنەگرت. نەوەکوو تەنیا ئاماژەی ناڕەزایەتی پیشاندا بە رەفتارێکی تەواو منداڵانە و ناپیشەگەرانە، بەڵکوو روویکردە رێڕەوی ژووری خۆگۆڕین و هاواری دەکرد: “من لە تیمەکە دەڕۆم.”
هەموو ئەو شتانەی دواتر روویاندا، لەگەڵ ئەو بێڕێزییەی ڤینیسیۆس وەکوو خاڵێکی وەرچەرخان، وایکرد بارودۆخەکە لە خراپەوە بەرەو خراپتر بڕوات. سەرەتا داوای لێبوردنەکەی ڤینیسیۆس لە رێگەی تۆرە کۆمەڵایەتییەکانەوە هات، کە تێیدا داوای لێبووردنی لە هەمووان کرد جگە لە چابی ئالۆنسۆ و پاشانیش نەبوونی پاڵپشتی بۆ راهێنەرەکە لەلایەن دەستەی کارگێڕی یانەکەوە.
کات تێپەڕی و فلۆرێنتینۆ پێرێز بڕیاریدا دەستبەرداری چابی ئالۆنسۆ بێت بۆ ئەوەی رێگا بۆ ئالڤارۆ ئاربێلوا بکاتەوە. لەگەڵ ئەوەشدا، ژووری خۆگۆڕین هەر وەکوو خۆی ماوەتەوە و بە لەبەرچاوگرتنی ئەوەی لە چەند رۆژی رابردوودا بینرا، لەگەڵ کیلیان ئێمباپێ کە لە کاتی چارەسەری پێکانەکەیدا لە گەشت و پشوودایە لە جیهاندا و لەگەڵ ئۆریلیەن چوامێنی و فێدێ ڤالڤێردێ، کە بەربوونەتە گیانی یەکدی، هەموو ئاماژەکان بۆ ئەوەن کە کێشەی ئەو ژوورە بە دیاریکراوی چابی ئالۆنسۆ نەبووە. ڤینیسیۆس، لە لایەکی دیکەوە، هێشتا گرێبەستەکەی نوێ نەکردووەتەوە و لە حوزەیرانی 2027 گرێبەستەکەی لەگەڵ ریال مەدرید کۆتایی دێت.
