راشفۆرد بووەتە بەڵا؛ کێشە بۆ پلانەکانی مانچێستەر یونایتد دروست دەکات

مارکۆس راشفۆرد بووەتە کێشەیەکی گەورە بۆ مانچێستەر یونایتد، تاوەکوو ئەو ئاستەی کە بارودۆخەکەی دەکرێت کاریگەریی لەسەر پلانەکانی گواستنەوەیان هەبێت.

مانچێستەر یونایتد دەیەوێت راشفۆرد بە شێوەیەکی هەمیشەیی بڕوات، بە پلەی یەکەم بۆ پاشەکەوتکردنی مووچە بەرزەکەی، کە نزیکەی 20 ملیۆن یۆرۆی تەواوە لە ساڵێکدا، لەگەڵ گرێبەستێک تاوەکوو ساڵی 2028. بەڵام بۆ ئێستا رێگرییان لێکراوە چونکە یانەی بارسێلۆنا مافی لەپێشینەی لەسەر یاریزانەکە تاوەکوو کۆتایی مانگی حوزەیران هەیە.

بەگوێرەی دەیلی مەیل، یونایتد پێویستە بەمزووانە داهاتووی راشفۆرد چارەسەر بکات، ئەگەر بییەوێت هەنگاو بەرەو پێش بنێت بۆ واژۆکردنی گرێبەست لەگەڵ رافائێل لیاو لە ئەی سی میلانەوە. ئەگەر راشفۆرد بمێنێتەوە یان رەتی بکاتەوە بڕوات، رەنگە گرێبەستەکەی لیاو شکست بهێنێت، ئەمەش بژاردەکانی یونایتد لە بازاڕدا سنووردار دەکات.

راشفۆرد ئامانجی لەپێشینەی مانەوە لە بارسا بوو، بەڵام ئێستا ئەگەری رۆیشتنی بەرەو زیادبوون دەچێت. گەڕانەوە بۆ مانچێستەریش بەهۆی کێشە نێوخۆییەکان و مووچەکەیەوە دوورە.

لە هەمان کاتدا، یانەکانی ئارسیناڵ، بایرن میونشن و نیوکاسڵ یونایتد چاودێریی بارودۆخەکە دەکەن. هێرشبەرە ئینگلیزییەکە بۆ ئەم یانانە پێشنیار کراوە، بەڵام هیچ کامیان ئامادە نین پارەی گواستنەوە بدەن و لە هەمان کاتدا مووچە تەواوەکەشی دابین بکەن.

بارسا پێشتر تێچووەکانی هەژمار کردووە و گواستنەوەی هەمیشەیی زۆر بە گران دەزانێت. راشفۆرد ئامادە دەبێت مووچەکەی کەم بکاتەوە لە پێناو گرێبەستێکی درێژخایەنتر، بەڵام ژمارەکان هێشتا بۆ یاریزانێک کە شوێنێکی سەرەکی مسۆگەر نەکردووە، ناگونجێن.

بۆ ئێستا بارسا مەیلی بۆ ئەوەیە کە نەیهێڵێتەوە، هەرچەندە گرێبەستێکی دیکەی خواستن وەکوو ئەگەرێک دەمێنێتەوە. ئێستا راشفۆرد لە رۆیشتن نزیکترە وەکوو لە مانەوە و خۆشی ئەوە دەزانێت.