یاریگا –
هەرچەندە یارییەکەی یاریگای ‘ئاڕ سی دی ئی’ نازناوی خولەکەی یەکلا نەکردەوە، بەڵام شتێکی زۆر روونکردەوە؛ ژووری خۆگۆڕینی ریال مەدرید لە نێو پشێویدایە.
مەدرید تەنیا بۆ شکۆ یاریی دەکرد، چونکە ئەوان پێشتر خولەکەیان دۆڕاندووە، بۆیە تەنیا دەیانویست خۆیان لە ئەنجامدانی رێڕەوی رێزلێنان بۆ یانەی بارسێلۆنا بەدوور بگرن، چونکە رووبەڕووبوونەوەی ئەوان لە نێو ستۆتیفای کامپ نۆو و لە کاتی ئاهەنگی هاندەرانیاندا، دۆخەکەی بۆ تیمەکە خراپتر دەکرد. لە بەرامبەردا ئیسپانیۆل هەموو هەوڵێکی خۆی دەدا؛ ئەوان بە درێژایی وەرز ئاستیان ناجێگیر بووە، بە شێوەیەک کە توانای پێشکەشکردنی ئاستی نایابیان هەیە و لە هەمان کاتیشدا لە ناوچەی دابەزیندا دەجەنگن.
کێشەیەک بە ناوی کارێراس
بە هەمان شێوەی ئاستی ئیسپانیۆل، روونکردنەوەی ئەو گرژییەی نێو ژووری خۆگۆڕینی مەدریدیش کارێکی سەختە. وا دیارە شتەکان تێکچوون و چاککردنەوەیان ئاسان نابێت. هەفتەی رابردوو دانی کارڤاخال رەخنەی لە ترێنت ئالیکساندەر ئارنۆڵد گرت، بەهۆی ئەوەی نەگەڕاوەتەوە بۆ بەرگری و لەم یارییەشدا سەرنجەکان چوونەسەر ئەلڤارۆ کارێراس.
مەدرید بڕی 50 ملیۆن یۆرۆی بۆ کڕینی کارێراس خەرج کرد دوای ئەوەی لە بەرامبەر بێنفیکا ئاستێکی نایابی نیشاندا و تەنانەت توانی لامین یامالیش رابگرێت. بەڵام ئەم وەرزەی زۆر ناجێگیر بووە؛ لە یاریزانێکی سەرەکییەوە بووەتە یاریزانێک کە بە دەگمەن یاری دەکات. بەرگریکارەکە لە 12 یاری رابردوودا تەنیا چوار یاریی بەشداری کردووە و پەیوەندییەکەی لەگەڵ ئالڤارۆ ئاربێلوا لە دۆخێکی باشدا نییە.
لەم یارییەدا کارێراس خۆی نەشاردەوە. فێرلاند مێندی وەکوو یاریزانی سەرەکی دەستی پێکرد بەڵام دوای 10 خولەک تووشی پێکان بوو. بە شێوەیەکی چاوەڕواننەکراو ئاربێلوا لەبری کارێراس، فران گارسیای هەڵبژارد؛ ئەمەش شتێک بوو کە یاریزانە گالیسییەکە تێی نەدەگەیشت. کامێراکان کارێراسیان گرت کە بەو بڕیارە پێدەکەنی، ئەم کاردانەوەیە کۆمەڵێک لە هاندەرانی مەدریدی تووڕە کرد.
Que hace Alvaro Carreras riéndose porque Fran Garcia va por delante de él ?
Este vestuario es una guardería de niñatos inflados pic.twitter.com/qbJtPnGyaj
— (fan) LOCOS REAL MADRID (@LocosRealMadrid) May 3, 2026
لەم کەشەی ئێستای مەدریددا، تەنانەت بچووکترین ئاماژەکانیش دەبنە کێشەی گەورە. پێکەنینەکەی کارێراس تەنیا وەکوو پێکەنینێک نەبینرا، بەڵکوو گرژییەکی زیاتری بۆ دۆخەکە زیادکرد. ئێستا هەر نیگایەک، هەر بڕیارێک و هەر ساتێک وەکوو ململانێیەکی گەورە شیکردنەوەی بۆ دەکرێت. جا جۆزێ مۆرینیۆ بێت یان یورگن کلۆپ یان هەر کەسێکی دیکە کە سەرپەرشتی تیمەکە بگرێتە دەست، بە روونی دیارە کە لە ناو ژووری خۆگۆڕیندا کارێکی زۆر چاوەڕێی دەستەی راهێنەران دەکات.
