یاریگا –
بیروبۆچوونەکان لە نێو ریال مەدرید بەرامبەر کارلۆ ئانچێلۆتی ئەرێنین، سەرەڕای لەدەستدانی نازناوی جامی شای ئیسپانیا و دۆڕاندنی یاریی کلاسیکۆ.
خەریکە سەردەمێکی نوێ لە ریال مەدرید دەستپێدەکات، هەموو ئاماژەکان بەرەو دەستنیشانکردنی راهێنەرێکی نوێن. ساشا تاڤۆلیێری، رۆژنامەنووسی تۆڕی سکای سپۆرتس بڵاویکردووەتەوە، چابی ئاڵۆنسۆ بڕیای کۆتاییداوە و لە کۆتایی ئەم وەرزە بایەر لیڤەرکوزن جێدەهێڵێت، لە چەند هەفتەی داهاتووشدا بەفەرمی بڕیارەکە رادەگەیەنێت.
راوول گۆنزالێز، ئەفسانەی ریال مەدرید و راهێنەری تیمی کاستیا، یەکێکی دیکەیە لە بەربژێرانی شوێنگرتنەوەی کارلۆ.
گۆنزالێز لە لێدوانێکیدا بۆ رۆژنامەی مارکا روونیکردووەتەوە؛
دڵخۆشم لێرە و لەو شوێنەم کە دەمەوێت لێیبم. کاتێک کاتی هەڵسەنگاندن دێت و یانەکە بڕیار دەدات، ئەوکاتە سەیری بابەتەکە دەکەین.
کاتی تەواومان دەبێت تاوەکو بڕیار بدەین و لەوانەیە کاریگەری لەسەر یانەکە دروستبکات. بەڵام من کەسێکی ئارامم.
راوول جەختیدەکاتەوە، پەیوەندییەکی زۆر باشی لەگەڵ ئانچێلۆتی هەیە و زۆر رێزی دەگرێت. لەبارەی قەیرانی ئەنجامەکانی ئەم دووایەی ریال مەدرید دەڵێت
گرنگتر بابەت ئێستا ئەوەیە، ئارام بگرین چونکە لە کۆتایی وەرز نزیکدەبینەوە و هێشتا زۆر بابەت یەکلایی نەکراونەتەوە. پێم وایە کاتی تەواومان دەبێ تاوەکو هەڵسەنگاندن بۆ دۆخەکە بکەین.
راوول شەش ساڵە سەرپەرشتیاری تیمی دووەمی ریال مەدریدە و چاوەڕێی دەرفەتێک دەکات، تاوەکو خۆی بگەیەنێتە تیمی یەکەم.
دوای جیابوونەوەی زینەدین زیدان و ریال مەدرید لە ساڵی 2021، گۆنزالێز بەربژێرێکی بەهێزی شوێنگرتنەوەی ئەفسانە فەڕەنسییەکە بوو، بەڵام لە کۆتاییدا دەستەی کارگێڕی مەدرید، بڕیاریدا ئەرکەکە بە ئانچێلۆتی بسپێرێت.
