ئەدیداس درێسی نوێی هەڵبژاردەی ئەڵمانیا نمایش دەکات
یاریگا –
ئەمڕۆ دووشەممە ئەدیداس پەردەی لەسەر درێسی تایبەتی هەڵبژاردەی ئەڵمانیا بەبۆنەی یادی 125 ساڵەی یەکێتی تۆپی پێی ئەڵمانیا لادا.
درێسەکە بە شێوەیەکی نەریتی سپییە، هێڵی رەش لەسەر قۆڵەکانی و ملی دیزاین کراوە. ئەم درێسە نوێیەیان جل و بەرگی مۆندیالی 1974 دەهێنێتەوە یاد؛ کاتێک ئەفسانەی کۆچکردوو فرانز بێکنباوەر و گێرد مۆلەر لەگەڵ هاوڕێکانیان لە مۆندیالدا بە بردنەوەی 2-1 لە هۆڵەندا لە یاریگای ئۆڵۆمپی میونشن جامەکەیان بەرزکردەوە.
125 Jahre DFB. Ein Trikot für die Ewigkeit. 🖤🤍
Sei Teil der Geschichte ✨
➡️ https://t.co/cZZLpkAbxR📸 DFB/Philipp Reinhard pic.twitter.com/qrWkIGIJfD
— DFB-Team (@DFB_Team) March 17, 2025
بە پێچەوانەی درێسەکانی ئێستای DFB، لۆگۆی فیدراسیۆن لەسەر ئەم وەشانە بە شێوەیەک دیزاین کراوە کە لە لۆگۆی مێژوویی سەردەمی دامەزراندنی فیدراسیۆنەکە بچێت: سێ پیتە تێکەڵاوەکەی DFB، لەبری هەڵۆی فیدراڵی. لە دەوری، بە بازنەیەک، بە پیتی گەورە نووسراوە: DEUTSCHER FUSSBALL-BUND 125 (یەکێتی تۆپی پێی ئەڵمانیا 125).
ئێستا دوای 51 ساڵ و لە قۆناخی چارەکی کۆتایی خولی نەتەوەکان بەرامبەر ئیتاڵیا (20ی ئازار و 23ی ئازار)، هەڵبژاردەی ئەڵمانی ئەم درێسە دەپۆشێت.
