مێرکاتۆی زستانە؛ نوێترین دەنگۆکانی گواستنەوەی یاریزانان لە خولی ئەستێرەکانی عێراق

یاریگا –

رۆژی چوارشەممە دەرگای بازاڕی گواستنەوەی زستانەی یاریزانان لە عێراق دادەخرێت، کە رۆژی 5ـی مانگی رابردوو دەرگای گواستنەوەی یاریزانان کرایەوە، لە کاتژمێرەکانی رابردوو جولەی یانەکان گەرموگوڕتر بووە و یانەکان دەیانەوێت لەم چەند رۆژەی ماوە هەوڵەکانیان چڕ بکەنەوە.

• هەولێر هەنگاوێک لە یەکلاکردنەوەی گرێبەستی رێبین سولاقا دوورە و لە چەند کاتژمێری داهاتوو بەرگریکارەکەی هەڵبژاردەی عێراق گرێبەستەکەی واژۆ دەکات، هەردوولا لەسەر بەندە سەرەکییەکان رێککەوتوون، تەنیا چەند وردەکارییەکی کەم ماوە.
• یانەی مینا بەفەرمی رۆیشتنی سۆمەر ماجد ناوەڕاستکاری یانەکەی راگەیاند و دەنگۆ هەیە ئەو یاریزانە 28 ساڵانە پەیوەندی بە ریزەکانی هەولێر بکات.
• فڕانک سێدریک هێرشبەری کامیرۆنی ئێستای یانەی گەرمە و پێشووی زاخۆ لە شاری هەولێرە و لە چەند کاتژمێری داهاتوو بەفەرمی دەبێتە یاریزانی یانەی هەولێر.
• گفتوگۆکانی نێوان هەولێر و سامەڕا لەسەر گواستنەوەی حەسەن فالح کازم تەواوبووە و یاریزانەکە رەزامەندی لەسەر پەیوەندیکردن بە هەولێر داوە و ئەمڕۆ گرێبەستەکەی رادەگەیێندرێت.
• حەمە ئیتۆ و هیران ئازاد دەیانەوێت ریزەکانی قوە جەوییە بەجێبهێڵن و لەگەڵ چەند یانەیەک لەگفتوگۆدان بۆ ئەوەی رووبکەنە یانەیەکی دیکە.
• ئەیمەن حوسێن تا کۆتایی وەرز پەیوەندی بە ریزەکانی یانەی وەکرەی قەتەڕی کرد.
• یانەی خالیدیەی بەحرەینی ئۆفەرێکی فەرمی پێشکەشی قوە جەوییە کردووە بۆ ئەوەی بیگوازێتەوە ریزەکانی، یاریزانە کوردەکە چاوەڕێی مافی دەستبەرداربوونی لە یانەی قوە جەوییە دەکات.
• کلاودیۆ ماڕادۆنا هێرشبەری بەڕازیلی لە رۆیشتنی لە ریزەکانی یانەی نەورۆز نزیکبووەتەوە و چاوەڕێ دەکرێت ئەمڕۆ بڕیاری کۆتایی لەبارەی داهاتووی خۆی بدات.
• حەمە ئیتۆ لە گەڕانەوەی بۆ یانەی نەورۆز نزیکبووەتەوە و ئەمڕۆ لەگەڵ بەرپرسانی یانەی قوە جەوییە کۆدەبێتەوە و بڕیاری کۆتایی خۆی دەدات.
• جگە لە نەورۆز، یانەکانی زەوڕا و تەلەبەش ئۆفەریان پێشکەشی حەمە ئیتۆ کردووە و دەیانەوێت بیگوازنەوە ریزەکانیان.
• یانەی گەرمە دەیەوێت عەلی شاخەوان ناوەڕاستکاری قوە جەوییە بگوازێتەوە ریزەکانی، بەڵام تا ئێستا جەوییە ئامادە نییە مافی دەستبەرداربوون بە یاریزانە کوردەکە بدات، دەیەوێت لەگەڵ یاریزانێکی دیکە لەگەڵ یانەیەک ئاڵوگۆڕی پێبکات.