راپۆرتی تایبەت؛ بۆچی تا ئێستا بارسێلۆنا نەیتوانیوە ناوی دانی ئۆلمۆ تۆمار بکات؟

یاریگا –

بارسێلۆنا تاوەکو ئێستا نەیتوانیوە ناوی دانی ئۆلمۆ لە لالیگا تۆمار بکات، تاوەکو سبەی شەو دەرفەت بە یانە کەتەلۆنییەکە دراوە بۆ ئەویە بتوانێت ناوی یاریزانە ئیسپانییەکەی تۆمار بکات، بەڵام تاوەکو ئێستا یانە کەتەلۆنییەکە نەیتوانیوە چارەسەرێک بدۆزێتەوە و بەدوای دەرچەیەکدا دەگەڕێت.

بۆچی بارسێلۆنا ناتوانێت ناوی ئۆلمۆ لە لالیگا تۆمار بکات؟

بەگوێرەی یاساکانی لالیگا هەر یانەیەک بەگوێرەی باڵانسی نێوان خەرجییەکان و داهاتەکانی دەتوانێت مووچەی یاریزانەکانی بدات، واتە نابێت یانەکان خەرجییەکی زۆر بکەن بەبێ ئەوەی هێندە داهاتیان هەبێت، ئەمەش بۆ پاراستنی یانەکانە لە مایەپووچبوون.

مانگی فێبرایەری 2024 بەگوێرەی راگەیاندراوێکی کۆمەڵەی لالیگا، بەرزترین رێژەی مووچەی رێگەپێدراوی بارسێلۆنا 204 ملیۆن یۆرۆ بوو لەکاتێکدا ئەوکات مووچەی یاریزانانی یانەکە دەگەیشتە 500 ملیۆن یۆرۆ، بارسێلۆنا بۆ ئەوەی ئەو ئاستی مووچەی رێگەپێدراوی یاریزانەکانی بگەیەنێتە ئاستی مووچەی راستەقینەی یاریزانەکانی، دەستی بە زیادکردنی داهاتەکانی کرد، دەستی بە فرۆشتنی ئەو یاریزانانە کرد کە مووچەیان زۆرە و دەستی بە گەڕان بەدوای گرێبەستی سپۆنسەریکردن و بەکرێدانی موڵکەکانی یانەکەی کرد، لە مانگی سێپتێمبەری 2024 ئاستی مووچەی رێگەپێدراوی یاریزانەکانی گەیاندە 426 ملیۆن یۆرۆ، لەکاتێکدا هێشتا ئاستی مووچەی راستەقینەی یاریزانەکانی بلاوگرانا 500 ملیۆن یۆرۆ بوو.

هەوڵەکانی بارسێلۆنا بۆ بەرزکردنەوەی ئاستی مووچەی یاریزانەکانی چی بوون؟

بارسێلۆنا لە رێگای نوێکردنەوەی گرێبەستەکەی لەگەڵ کۆمپانیای نایکی 18 ملیۆن یۆرۆ پاشەکی گرێبەستەکەی وەرگرت و 15 ملیۆن یۆرۆشی وەکو پاشەکی گرێبەستەکەی بۆ فرۆشتنی ستۆدیۆکانی بۆ هەژمارکرا.

لالیگا 39 ملیۆن یۆرۆی وەکو لێخۆشبوونێک بۆ کارەکانی نۆژەنکردنەوەی یاریگای کامپ نوو بۆ بارسێلۆنا هەژمارکرد، ئەمەش وەکو ٪5ـی قەرەبووکردنەوەی کارەکانی نۆژەنکردنەوەی یانەکە بوو.

بارسێلۆنا کاتێک ستۆدیۆیەکانی بە 200 ملیۆن یۆرۆ فرۆحشت، وابڕیاربوو هاوینی 2022 پێشەکی گرێبەستەکەی (20 ملیۆن یۆرۆ) وەربگرێت، 180 ملیۆن یۆرۆیەکەی دیکە لە ماوەی سێ ساڵدا وەربگرێت، واتە هەر ساڵێک 60 ملیۆن یۆرۆی پێبدرێت، بەڵام رێژەی داهاتی هەر ساڵێک لە 40 ملیۆن یۆرۆ زیاتر نەبوو.

بارسێلۆنا بۆ ئەوەی کورتهێنانەکەی داهاتی فرۆشتنی ستۆدیۆیەکانی پڕ بکاتەوە، پەنای بردە بەر نوێکردنەوەی گرێبەستی نایکی، کە 154 ملیۆن یۆرۆی وەکو شیرینی نوێکردنەوەی گرێبەستەکەی پێدرا، یانە کەتەلۆنییەکە دڵخۆشبوو بەوەی بە شیرینی نوێکردنەوەی گرێبەستەکەی نایکی بگاتە ئاستی راستەقینەی مووچەی یاریزانەکانی.

بارسێلۆنا بەرامبەر 1.7 ملیار یۆرۆ بۆ ماوەی 14 ساڵ گرێبەستەکەی لەگەڵ نایکی نوێکردەوە و 154 ملیۆن یۆرۆی وەکو شیرینی نوێکردنەوەی گرێبەستەکەی پێدرا، بەڵام لالیگا بڕیاریدا ئەو بڕە پارەیەی شیرینی گرێبەستەکە دابەشی هەر 14 ساڵ بکرێت، نەوەک تەنیا بۆ داهاتی ئەمساڵ هەژمار بکرێت، بەمەش لەجیاتی ئەوەی 154 ملیۆن یۆرۆ بچێتە سەر باڵانسی داهاتەکانی ئەم وەرزەی یانەکە، تەنیا 11.5 ملیۆن یۆرۆ وەکو داهاتی نوێکردنەوەی گرێبەستەکەی بۆ ئەم وەرزە هەژمارکرا.

پلانی B بارسێلۆنا بۆ تۆمارکردنی ناوی دانی ئۆلمۆ چییە؟

بارسێلۆنا دەستی بۆ دوایین کارتی بردووە و دەیەوێت بە فرۆشتنی کورسییەکانی VIP بتوانێت 100 ملیۆن یۆرۆی دەستبکەوێت بۆ ئەوەی بتوانێت ئەو کورتهێنانە لە ئاستی مووچەی رێگاپێدراوی یاریزانەکانی پڕ بکاتەوە، بەڵام کۆمەڵەی لالیگا گومانی لە بەڵگەنامەکانی بارسێلۆنا هەیە و دەیەوێت دڵنیایی زیاتری لەبارەی گرێبەستەکەوە پێبدرێت.

پێشتر چەند جارێک لالیگا گومانی لە راستی و دروستی بەڵگەنامەکانی بارسێلۆنا هەبووە، بۆیە یانە کەتەلۆنییەکە متمانەی لەدەست داوە و کۆمەڵەی لالیگا دەیەوێت دڵنیابێتەوە گرێبەستی فرۆشتنی کورسییەکانی VIP یاریگای بارسێلۆنا ساختە نین.

بەهۆی پێکانی ئاندریاس کریستیێنسن رێگا بە بارسێلۆنا درا لە سەرەتای وەرزەوە ناوی ئۆلمۆ تۆمار بکرێت.

بارسێلۆنا هیوای ماوە سبەی هەینی ناوی ئۆلمۆ لە لالیگا تۆمار بکات

رۆژنامەکانی موندۆ دیپۆرتیڤۆ و سپۆرتی کەتەلۆنی ئاشکرایان کردووە، هێشتا بارسێلۆنا هیوای ماوە و لە هەوڵەکانیان بەردەوامن بۆ ئەوەی بتوانن سبەی هەینی ناوی دانی ئۆلمۆ لە لالیگا تۆمار بکەن.

بارسێلۆنا تاوەکو دوایین کاتژمێرەکانی رۆژی سێشەممە دەرفەتی هەبوو ناوی ئۆلمۆ تۆمار بکات، بەڵام سێ رۆژی بۆ درێژکرایەوە و تاوەکو سبەی شەو دەرفەتی هەیە بەڵگەنامەکانی پێشکەش بکات و لالیگا رازی بکات ناوی ئۆلمۆ لە لیستی یاریزانانی خولەکە تۆمار بکاتەوە.

رۆژنامەی سپۆرتی کەتەلۆنی ئاشکرایکردووە، ئەگەر بارسێلۆنا نەتوانێت ناوی ئۆلمۆ تۆمار بکات ئەوا 263 ملیۆن یۆرۆ زەرەر دەکات (48 ملیۆن یۆرۆ مووچە، 55 ملیۆن یۆرۆ نرخی گرێبەست، 60 ملیۆن یۆرۆ نرخی بۆرسە، 100 ملیۆن یۆرۆ زیانی کورسییەکانی VIP).