یاریگا –
قاچی چەپی جاڕۆد بۆون، کاپتنی وێستهام یونایتد لە یاریی رابردووی تیمەکەی بەرامبەر لیڤەرپوول شکا.
یانە لەندەنییەکە لە بەیاننامەیەکدا هەواڵی پێکانەکەی بڵاوکردەوە، بەڵام بەبێ ئەوەی وادەی گەڕانەوەی دەستنیشان بکات.
تۆڕی ئاتلێتیک لە زاری سەرچاوەیەکی نزیک لە دەستەی کارگێڕی وێستهام بڵاویکردووەتەوە، پێشبینی دەکرێت لانیکەم بۆون بۆ ماوەی شەش هەفتە دووردەکەوێتەوە.
بۆون لە ناوەڕاستی گێمی دووەمی یاریی پێشوو تووشی پێکانەکەبوو، دوای پێکدادانی لەگەڵ ئەلێکسیس ماک ئالیستەر. کریسێنسیۆ سەمەرڤیڵ لە شوێنی بۆون یارییەکەی تەواوکرد.
بۆون گۆڵکاری ئەم وەرزەی وێستهامە لەسەر ئاستی سەرجەم پاڵەوانیەتییەکان، تاوەکو ئێستا شەش گۆڵی لە 21 یاریدا کردووە.
وێستهام لە پلەی 13ی ریزبەندی پرێمەرلیگدا دێت و شەممە دەبێتە میوانی مانچێستەر سیتی و دواتر لە جامی FA لە ڤیلا پارک رووبەڕووی ئاستۆن ڤیلا دەبێتەوە و لە 10ی ئەم مانگە لە پرێمەرلیگ میوانداری فولهام دەکات.
