خەڵاتی گەورەی سعودیە؛ هیچ شۆفێرێک ڤێرستاپنی پێ راناگیرێت

یاریگا –

ماکس ڤێرستاپن، شۆفێری تیمی رێدبوڵ بووە پاڵەوانی خەڵاتی گەورەی سعودیە بۆ کێبڕکێیەکانی فۆرمولا وەن.

لە کێبڕکێی دووەمی وەرزی نوێدا و بە ئامادەبوونی سەدان کەسایەتی وەرزشی و سیاسی وەک میر عەبدولعەزیز فەیسەڵ، وەزیری وەرزشی سعودیە، جۆزێ مۆرینیۆ، راهێنەری پۆرتوگالی، زڵاتان ئیبراهیمۆڤیچ، کەریم بێنزێما، جۆتا، فابینیۆ و فەیسەڵ غامدی یاریزانانی ئیتیحاد. ڤێرستاپن جارێکی دیکە بووەوە پاڵەوان.

پاڵەوانی سێجارەی جیهان، بە جیاوازی 13 چرکە پێش سێرجیۆ پێرێزی هاوتیمی خۆی کەوت. ئەمە باشترین دەستپێکە بۆ شۆفێرە هۆڵەندییەکە و تیمی رێدبوڵ.

چارل لوکلێر، شۆفێری تیمی فێراری پلەی سێەمی بەدەستهێنا.

ڤێرستاپن نۆیەم بردنەوەی لەسەریەک بەدەستهێنا، چونکە لە کێبڕکێی خەڵاتی گەورەی ژاپۆنەوە بەردەوام یەکەمی کێبڕکێیەکان بووە و کۆی خاڵەکانی لەم وەرزەدا بۆ 51 بەرزکردەوە و پێرێزی هاوتیمی نزیکترین رکابەرییەتی و 36 خاڵی کۆکردووەتەوە.

رێدبوڵ بە کۆکردنەوەی 87 خاڵ لە پلەی یەکەمی ریزبەندی تیمەکان دێت و فێراریش بە 49 خاڵ پلەی دووەمی تیمەکانی گرتووە.

ئۆسکار پیاستری، شۆفێری تیمی مەکلارن پلەی چوارەمی بەدەستهێنا و فێرناندۆ ئاڵۆنسۆ، شۆفێری تیمی ئاستۆن مارتن لە پلەی پێنجەم و جۆرج رەسڵ، شۆفێری تیمی مێرسێدێس لە پلەی شەشەمدا هات.

ئۆلیڤەر بیرمان، وەک شۆفێری یەدەک بۆ کارلۆس ساینز لە تیمی فێراری بەشداری کێبڕکێیەکەی کرد و پلەی حەوتەمی بەدەستهێنا. ساینز بەهۆی هەوکردنی ریخۆڵەکوێرەی، نەیتوانی بەشداری کێبڕکێیەکە بکات.

هەریەکە لە لاندۆ نۆریس، شۆفێری تیمی مەکلارن و لویس هامڵتن، شۆفێری تیمی مێرسێدێس لە پلەکانی هەشتەم و نۆیەمدا هاتن.

ڤێرستاپن دەرچووی یەکەمی خەڵاتی گەورەی سعودیە بوو، تاوەکو کۆتایی کێبڕکێیەکەش لە پلەی یەکەمدا مایەوە. پێرێز توانی پێش لوکلێر بکەوێتەوە و پلەی دووەمی لێبستێنێت.

رووداوێکی نەخوازراو لە سووڕی سێیەمی کێبڕکێیەکە روویدا، کاتێک ئۆتۆمبێلەکەی لانس ستڕۆڵ، شۆفێری ئاستۆن مارتن بەر دیوار کەوت و بووە هۆکاری دوورخستنەوەی لە کێبڕکێیەکە.

ڤێرستاپن تایەی توندی بۆ 40 سووڕ بەکارهێنا، هەرچەندە خۆی حەزی بەو جۆرە تایانە نییە، بەڵام لە دوای کێبڕکێیەکە روونیکردەوە، بە ناچاری تایە توندەکانی بەکارهێناوە.