یاریگا –
جەمال موسیالا، ئەستێرەی لاوی بایرن میونشن دەڵێت، تیپەکەی رقی لە دۆڕاندنە و باردودۆخیان بەرامبەر لازیۆ زۆر جیاواز دەبێت.
شەوی رابردوو بایرن میونشن لە چوارچێوەی هەفتەی 24ی بۆندسلیگا بەرامبەر فرایبۆرگ یاریی کرد و بە ئەنجامی 2-2 یارییەکە کۆتایی هات.
موسیالا توانی لە خولەکی 75 گۆڵی دووەمی یانەکەی تۆمار بکات و هیوای خواست بایرن بەم گۆڵە سەرکەوتن بەدەست بهێنێت، بەڵام ئەمە رووی نەدا و لە خولەکی 87 گۆڵی یەکسیانیان لێکراوە.
ئه ستێره ئەڵمانییەکه دوای یارییەکه له چاوپێکەوتنێکدا گوتی:
ئێمه بایرنین و رقمان له دۆڕانه. لەوەتەی پەیوەندیم بەم یانەیەوە کردووە، دەزانم بایرن هەمیشە بەدوای سەرکەوتن و پاڵەوانێتیدا دەگەڕێت. ئێستا دۆخەکە بۆ ئێمە زۆر بێزارکەرە. هەموومان دەمانەوێت سەرکەوین و ناوسناوی ئەم وەرزەش بەدەست بهێنین. دەبێت ئەرێنی بیر بکەینەوە و باشترین یاری بکەین دواتر دەبینین چی روودەدات.
ناوەڕستکارە لاوەکە لە درێژەی قسەکانیدا گوتی:
هەرچەندە ئەمڕۆ سەرکەوتنمان بەدەست نەهێنا، بەڵام هەلی گۆڵکردنی زۆرمان هەبوو و ئەوەش شتێکی ئەرێنییە. ئەگەر بتوانین کاریگەرتر بین، ئەنجامەکان جیاواز دەبێت. دەبێت رۆژی سێشەممە هەلی گۆڵکردنی زۆر دروست بکەین و لە باشترین بارودۆخدا بین. ئەگەر ئێمە بەدوای پاڵەوانیەتی دا دەگەڕێین، دەبێت ئەم دەرفەتانە بقۆزینەوە و بە گۆڵ کردن نیشانی بدەین کە ئێمە پاڵەوانین.
جەمال موسیالا، لە ماوەی ژیانی وەرزشیدا لە خولی ئەڵمانیا 108 یاری ئەنجامداوە. لەو ژمارەیەش 74 بردنەوەی بەدەستهێناوە، 29 گۆڵیشی بۆ باڤارییەکان کردووە.
