بێنزێما چارەنووسی خۆی یەکلاییکردەوە

یاریگا –

کەریم بێنزێما، ئۆفەرێکی گرانبەهای یانەیەکی سعودی رەتکردەوە.

رۆژنامەی مارکا بڵاویکردووەتەوە، یانەیەکی سعودی ئۆفەرێکی گرانبەهای پێشکەش بە کەریم بێنزێما، هێرشبەری ریال مەدرید کرد، بەڵام ئەستێرە فەرەنسییەکە، ئۆفەرەکەی رەتکردەوە، بۆ ئەوەی لە ریال مەدرید بمێنێتەوە.

رۆژنامەکە روونیکردووەتەوە، بێنزێما دەیەوێت لانی کەم بۆ وەرزێکی دیکەش لە ریال مەدرید بمێنێتەوە و بیرۆکەی جێهێشتنی سانتیاگۆ بێرنابیۆی لە هزری خۆی دەرکردووە.

رۆژنامەی مارکا جەخدەکاتەوە، ئۆفەری یانە سعودیەکە تەنیا لەڕووی ماددیەوە باش نەبوو، بەڵکو بەڵێینی کردنەوەی ئەکادیمیایەکی گەورەی تۆپی پێ لە سعودیە و دانانی وێنەی بێنزێما لەسەری، لە نێو ئۆفەرەکەدا بوو.

بێنزێما لە هاوینی ساڵی 2009 لە لیۆنەوە پەیوەندی بە ریال مەدرید کرد و لە یاری رابردووشدا بەرامبەر بارسێلۆنا لە جامی شای ئیسپانیا، هاتریکی کرد.

بێنزێما تاوەکو ئێستا 348 گۆڵی لەگەڵ ریال مەدرید کردووە و 165 گۆڵیشی لە 637 یاریدا دروستکردووە.