یاریگا–
چاڤی هێرناندێز، راهێنەری یانەی بارسێلۆنای ئیسپانیا لە کۆنگرەی رۆژنامەوانی پێش یاری یانەکەی بەرامبەر ریال مەدرید لە جامی سوپەری ئیسپانیا باس لە جیاوازی بارودۆخی یاری کلاسیکۆ دەکات.
راهێنەرەکەی بلاوگرانا لەمبارەوە گووتی ” جامی سوپەر دەرفەتێکی باشە بۆ بەدەستهێنانی ناسناو، راستە ریال مەدرید لە لالیگا ئاستێکی باشی هەیە، بەڵام یاری کلاسیکۆ هەمیشە بارودۆخی جیاواز بووە ”.
چاڤی سەبارەت بە گەڕانەوەی پێدری و تۆرێس دەڵێت ” گەڕانەوەی ئەو دوو یاریزانە هەواڵێکی دڵخۆشکەر بوو، بەڵام تاوەکو ئێستا روون نیە ئەوان بتوانن یاری بکەن، دەمانەوێت یاریزانەکانمان لە یارییەکانی داهاتووش جیاوازی دروست بکەن، خۆشحاڵم بە گەڕانەوەیان ”.
راهێنەری بارسێلۆنا سەبارەت بە سییانەی هێلی پێشەوە یانەکەشی دەڵێت ” هەموو ئەو یاریزانانەی بەردەستن دەتوانن جیاوازی دروست بکەن، ئێمە چەند یاریزانێکمان لە ڤایرۆسی کۆرۆنا رزگاریان بووە، هەمووان دەتوانن جیاوازی دروست بکەن ”.
