یاریگا–
ئێرلینگ هالاند، هێرشبەرە لاوەکەی هەڵبژاردەی نەرویج و یانەی بورووسیا دۆرتمۆندی ئەڵمانیا، بەهۆی ئاستە بەرزەکەی بووەتە ئامانجی چەندین یانەی ئەوروپی، بەڵام یانەکەی نایەوێت بە ئاسانی دەستبەرداری بێت.
رۆژنامەی وەرزشی مۆندۆ دێپۆرتیڤۆی کەتەلۆنی بڵاویکردەوە، کارگێری زەردەواڵەکان ئامادەن لە پێناو رازی کردنی هێرشبەری یانەکەیان بۆ نوێکردنەوەی گرێبەستەکەی، مووچەکەی زیاد بکەن و ئەو یاریزانە نەهێڵن ریزەکانی یانەکەیان جێبێڵێت و چاوەڕێش دەکرێت مووچەکەی لە نێوان 8 بۆ 15 ملیۆن یۆرۆ زیاد بکرێت.
هالاند هاوینی ساڵی 2022 گرێبەستەکەی لەگەڵ بورووسیا دۆرتمۆند کۆتایی دێت و مەرجی هەڵوەشاندنەوەی گرێبەستەکەشی 75 ملیۆن یۆرۆیە.
