یاریگا–
خۆزێ مۆرینیۆ، راهێنەری پۆرتوگاڵی یانەی رۆمای ئیتاڵیا لە نوێترین دەرکەوتنیدا پێیوایە ئێدین هازارد یاریزانێکی لێهاتووە و لە هەمان کاتدا کەریم بێنزێما هێرشبەری یانەی ریال مەدریدیش رەمزی ئەم یانەیە.
لە چاوپێکەوتنێکدا راهێنەرە پۆرتوگاڵیەکەی یانە ئیتاڵیەکە دەڵێت ” راستە هازارد لەوانەیە بە درێژایی یارییەکان 88 خولەک هیچی پێنەکرێت، بەڵام دوو خولەک بەسە بۆ ئەوەی هەموو شتێک یەکلایی بکاتەوە، بۆیە من پێموایە دوای جامی نەتەوەکانی ئەوروپا ئەو دەگەڕێتەوە سەر ئاستی راستەقینەی خۆی ”.
مۆرینیۆ لە بەشێکی دیکەی قسەکانیدا سەبارەت بە کەریم بێنزێما هێرشبەری یانەی ریال مەدرید گووتی ” ئەو یاریزانێکی خراپ بوو، بە پێکەنینەوە، بەڵام دواتر خۆی لەگەڵ یانەکەی گونجاند و بووە یەکێک لە باشترینەکانی ئەو یانەیە و ئێستاش ئەو رەمزی یانەکەیەتی”.