ناگەڕێمەوە؛ ئەستێرەیەک لە هەڵبژاردەی سێنیگال یاخی دەبێت

یاریگا –

پاپێ گویێ، یاریزانی هێڵی ناوەڕاستی سێنیگال دوای دەرکرانی بەئازاری وڵاتەکەی بەرامبەر بەلجیکا هاتە دەنگ.

یاریزانەکەی ڤیاڕیال هۆشدارییەکی کۆتایی ئاراستەی فیدراسیۆنی تۆپی پێی سەنیگال کرد و روونی کردەوە کە ناگەڕێتەوە بۆ تیمی نیشتمانی تاوەکوو ئەو کاتەی دەستەی راهێنەرانی ئێستا لە پۆستەکانیاندا بمێننەوە. کەمپەینی جامی جیهانیی سێنیگال بە کۆتاییەکی بەئازار گەیشت سەرەڕای پێشکەوتنێکی ئاسان بەرامبەر بەلجیکا. وا دەردەکەوت کە تیمە ئەفریقییەکە کۆنترۆڵی یارییەکەی کردبێت تاوەکوو خولەکی 86، کاتێک گۆڵەکانی رۆمێلو لوکاکو و یۆری تیلیمانس گەڕانەوەیەکی دراماتیکییان بۆ تیمەکەی رودی گارسیا هەڵگیرساند، کە لە کۆتاییدا دوای کاتی زیادکراو گەیشتنیان بە قۆناخی 16 مسۆگەر کرد. بێهیوایی لەنێو کەمپی سێنیگالدا یەکجار زۆر بوو.

یەکێک لە یاریزانەکان کە بە ئاشکرا کاردانەوەی هەبوو پاپێ گویێ بوو. ئەو یاریزانە تەمەن 27 ساڵانە کە بە ئاشکرا نائومێد ببوو، تۆڕە کۆمەڵایەتییەکانی بەکارهێنا بۆ راگەیاندنی ئەوەی کە لە تۆپی پێی نێودەوڵەتی دوور دەکەوێتەوە مەگەر گۆڕانکاریی لە دەستەی راهێنەراندا بکرێت.
ئەو لە پاڵ وێنەیەکدا لەسەر ئەکاونتی ئینستاگرامەکەی نووسیویەتی:

رۆژێکی دیکە باسی دەرکرانمان دەکەم، بەڵام ئەمڕۆ دەمەوێت رایبگەیێنم کە تاوەکوو ئەو کاتەی ئەم دەستەی راهێنەرانە لە پۆستەکانیاندا بمێننەوە، من پشوویەک لە تیمی نیشتمانی وەردەگرم.

گویێ یەکێکە لە کارێکتەرە سەرەکەییەکانی شێرەکانی تێرانگا و بە روونی دڵگران بوو کاتێک لە خولەکی 66 بەرامبەر بەلجیکا گۆڕانکاری پێکرا. پاپێ تیاوی راهێنەر بڕیاریدا گۆڕانکاریی پێبکات سەرەڕای ئەوەی یاریزانەکەی هێڵی ناوەڕاست پێی وابوو توانای بەردەوامبوونی هەیە.

گوێ دوای یارییەکە هەر لەنێو یاریگا گوتی:

بە تەواوەتی هەستم بە باشی دەکرد، لە رووی جەستەیییەوە، بە باشی یارییم دەکرد، بەڵام راهێنەر بڕیارەکان دەدات و تەواو.

پێشتر، تیاو هۆکاری پشت گۆڕانکارییەکانی روون کردبووەوە و گوتبووی:

نەمانتوانی پارێزگاری لە پێشکەوتنی 2-0 بکەین. هەر کەسێک دەتوانێت بۆچوونی خۆی لەسەر لێدانی سزاكە هەبێت، بەڵام من نامەوێت باسی ئەوە بکەم. یاریزانمان هەبوو کە کێشەی جەستەیی هەبوو و بە سادەیی نەیدەتوانی بەردەوام بێت، بۆیە ناچار بووین گۆڕانکاریی بکەین. ئەوە تۆپی پێیە و دەبێت قبووڵی بکەین.

ئێستا مشتومڕ لە سێنیگال هەڵگیرساوە و هەڵوێستە گشتییەکەی گویێ فشاری زیاتر دەخاتە سەر فیدراسیۆنەکە لەدوای دەرچوونی تیمەکە لە جامی جیهانی.