یاریگا –
خوان لاپۆرتا، سەرۆکی بارسێلۆنا پەیامێکی روونی ئاراستەی ئاتلێتیکۆ مەدرید کرد سەبارەت بە خولیان ئالڤارێز. لاپۆرتا دوای رێوڕەسمی دەستبەکاربوونی رایگەیاند کە یانەکە لە پێکهاتەی ئێستای رازییە، بەڵام دەرگای کراوەیە بۆ بەهێزکردنی هێڵی هێرشبەری دوای رۆیشتنی رۆبێرت لیڤاندۆڤسکی.
لەو بارەیەوە لاپۆرتا گوتی:
ئێمە دەمانەوێت بەردەوام بین لە بردنەوەی نازناوەکانی خول و جامەکان و کێبڕکێ لە چامپیۆنزلیگدا بکەین. ئەگەر هیچ یاریزانێکیش نەهێنین، ئەوە کێشە نییە، بەڵام دەتوانین ببینە تیمێکی کێبڕکێکارتر. ئەگەر دێکۆ بڕیار بدات کە پێویستمان بە هێرشبەرێکی دیکەیە، ئەوا لە چوارچێوەی سنوورە دارایی و وەرزشییەکانماندا ئەنجام دەدرێت.
دواتر بە شێوازێکی راشکاوانە باسی لە بارودۆخی خولیان ئالڤارێز کرد و گوتی:
ئێمە ئۆفەرێکمان پێشکەشی ئاتلێتیکۆ مەدرید کردووە و ئەوان بە تەواوتی دەزانن بابەتەکە چییە. یاریزانەکە خۆی دەیەوێت بێت. من رێزێکی زۆرم بۆ ئێنریکێ سێرێزۆ و میگێل ئانخێل خیل مارین هەیە، کە پێیان راگەیاندین نایانەوێت یاریزانەکە بفرۆشن چونکە جێگرەوەیان نییە. ئەوان دەزانن ئۆفەرەکەی ئێمە جدییە، بەڵام بۆ هەمیشە بە کارایی نامێنێتەوە.
لاپۆرتا جەختی لەوە کردەوە کە بارسێلۆنا پشت بە بڕیاری ئاتلێتیکۆ مەدرید نابەستێت و تەنیا لە کاتێکدا بەردەوام دەبێت لە گفتوگۆکان ئەگەر یانە مەدریدییەکە هەڵوێستی خۆی بگۆڕێت کاتێک ئۆفەرەکە هێشتا لەسەر مێزەکەیە. سەرۆکەکەی بارسێلۆنا دەشڵێت:
ئەگەر ئەوان بڕیار بدەن قسە بکەن لە کاتێکدا ئۆفەرەکەمان هێشتا لەسەر مێزەکەیە، ئێمە دڵخۆش دەبین بە دانوستان. بەڵام ئۆفەرەکەی ئێمە لە رووی کاتەوە بێسنوور نییە.
هەروەها لاپۆرتا سکالاکانی ئاتلێتیکۆی بۆ فیفا سەبارەت بەم گواستنەوەیە رەتکردەوە و جەختی لەوە کردەوە کە بارسێلۆنا بە درێژایی پرۆسەکە بە ئاشکرا کاری کردووە، گوتیشی:
یاریزانەکە بە سادەیی گوزارشتی لە خەونی خۆی کردووە. ئێمە زۆریمان لە هیچ شتێک نەکردووە. خولیان لە پێش پەیوەندیکردنی بە مانچستەر سیتییەوە لەژێر چاودێریی ئێمەدا بووە. ئۆفەرەکەی ئێمە بە روون و ئاشکراییەوە پێشکەش کرا. ئێمە پێشتر چەندین گرێبەستمان لەگەڵ ئاتلێتیکۆ کردووە و هیوادارم ئەوان دووبارە بیر بکەنەوە. ئەگەر نا، با بە سادەیی ئاگادارمان بکەنەوە. رۆیشتن بۆ فیفا وا دەردەکەوێت کە کەسێک تەنیا هەوڵ دەدات کێشەیەکی ناپێویست دروست بکات.
