چاوەڕێی چارەنووسی دەکات؛ چەندین یانەی پرێمەرلیگ چاودێریی دۆخی کاماڤینگا دەکەن

یاریگا –

هەواڵەکان ئاماژە بەوە دەکەن کە یاریزانە ئێدواردۆ کاماڤینگای ناوەڕاستکار هیوادارە لە ریال مەدرید بمێنێتەوە، بەڵام هەموو نیشانەکان ئاماژە بەوە دەکەن کە ئەو بەربژێری سەرەکیی یانەکەیە بۆ فرۆشتن بە مەبەستی کۆکردنەوەی پارە بۆ بەهێزکردنی زیاتری پێکهاتەکە.

کەمێک زیاتر لە مانگێک لەمەوبەر، دیدیێ دیشامپ، راهێنەری تیمی نیشتمانیی فەرەنسا، پێکهاتەی 26 یاریزانیی خۆی بۆ مۆندیالی 2026 لە کەنەدا، ویلایەتە یەکگرتووەکان و مەکسیک لەماوەی هەواڵەکانی ئێوارەی TF1 راگەیاند. ئیدواردۆ کاماڤینگا نەخرابووە ناو پێکهاتەکەوە.

لەبری ئەوەی لەسەر بێهیواییەکەی بوەستێت، کاماڤینگا کاتەکەی بە شێوازێکی بەرهەمدار بەکارهێنا لە رێگەی تەواوکردنی خولێکی چوار رۆژەی هارڤارد سەبارەت بە بازرگانیی کاتبەسەربردن، میدیا و وەرزش.

بۆ ئێستا وا دەردەکەوێت کاماڤینگا ناجێگیرترین پێگەی لەنێو پێکهاتەکەی ریال مەدریددا هەبێت. یانەکە پێشتر ئەوەی روون کردووەتەوە کە پێش جێبەجێکردنی داواکارییەکانی گواستنەوەی ماوەی جۆزێ مۆرینیۆ، دڵێکی بەرگری و یاریزانێکی هێڵی ناوەڕاستی داینامیکیی خاوەن کوالێتی بەرز، پێویستە سەرەتا فرۆشتنێکی گەورە ئەنجام بدات. ئێستاش هەموو رێگاکان بەرەو کاماڤینگا دەچن.

ئەوە راستە کە دوو وەرزی کۆتایی ئەو لە مەدرید زۆر لە خوار ئەو ئاستەوە بوون کە نیشانیدا، بە تایبەتی لە یاریی کۆتایی چامپیۆنزلیگی 2024. کاتە بوو کە بەگوێرەی ترانسفێرمارکت، بەهای بازاڕیی ئەستێرە فەڕەنسییەکە گەیشتە لووتکەی خۆی کە 100 ملیۆن یۆرۆ بوو. دوای دوو کەمپەینی بێهیواکەر، بەهاکەی بۆ 50 ملیۆن یۆرۆ دابەزیوە.

ئاستە بێهیواکەرەکەی، کە لووتکەکەی بەوە بوو کە زۆر کەس وەکوو کارتێکی سووری ناپێویست لە قۆناخی چارەکی کۆتایی چامپیۆنزلیگ بەرامبەر بایرن میونشن دەیانبینی، ئەو باوەڕەی بەهێز کردووە کە دەکرێت لەماوەی گواستنەوەی ئەم هاوینەدا بڕوات.

تاوەکوو ئێستا هیچ ئۆفەرێکی فەرمی نەهاتووە، بەڵام دەنگۆیەکی بەردەوام هەبووە کە ئەو بە یانەکانی ئینگلتەرا، ئیتاڵیا و فەرەنساوە دەبه‌ستێتەوە. بەگوێرەی رۆژنامەی ئاس، چەندین یانەی پرێمەرلیگ چاودێریی دۆخی ئەو دەکەن، لە کاتێکدا لە ئیتاڵیا بە ئینتەر میلانەوە بەستراوەتەوە. هاوكات، پاریس سان جێرمان لە مێژەوە سەرسامی ئەوە، کە ئەمەش دەگەڕێتەوە بۆ کاتی دەرکەوتنی لە ستاد رێنس.

بێگوێدانە شوێنی مەبەستەکە ریال مەدرید داوای لانی کەم 60 ملیۆن یۆرۆ بۆ ئەم یاریزانەی هێڵی ناوەڕاست دەکات. بەڵام چاوەڕوان دەکرێت بڕیاری کۆتایی لای جۆزێ مۆرینیۆ بێت.

بۆ ئێستا، کاماڤینگا لە پشوودا دەمێنێتەوە تاوەکوو 13ـی تەممووز، کە بڕیارە تێیدا بگەڕێتەوە بۆ ڤاڵدێبێباس بۆ ئەنجامدانی پشکنینە پزیشکییەکانی پێش دەستپێکردنی مەشق و راهێنانەکانی پێش وەرز لەگەڵ هاوڕێکانی و راهێنەرە نوێیەکەی لە رۆژی دواتریدا.

لەم قۆناخەدا، چاوەڕێ دەکات تاوەکوو بزانێت رووداوەکان چۆن گەشە دەکەن.

گفتوگۆیەک لەگەڵ مۆرینیۆدا دەکرێت یەکلاکەرەوە بێت. رەنگە کاماڤینگا قایل بکات بیرکردنەوە لە ئۆفەرەکانی دەرەوەی وڵات بکاتەوە، یاخود بە پێچەوانەی هەموو پێشبینییەکانەوە، رێگەی پێبدات راهێنەرە پۆرتوگالییەکە قایل بکات کە ئەو شایەنی مانەوەیە لە ریال مەدرید.