با سەرکێشییەکە دەست پێ بکات؛ هاوبەشی ژیانی کوکورێیا ئاهەنگ دەگێڕێت

یاریگا –

کڵاودیا رۆدریگێز، هاوبەشی ژیانی کوکورێیا، لە رێگەی تۆڕە کۆمەڵایەتییەکانەوە ئاهەنگی گێڕا بۆ گواستنەوەی مارک کوکورێیا بۆ ریال مەدرید.

ئەم ئینفلۆنسەرە ناسراوە کە هاوکات دیزاینەری مۆدە و بالێیەکە، پۆستێکی بۆ ماڵاوایی لە چێڵسی بڵاوکردەوە، کە هاوپێچ بوو لەگەڵ وێنەیەکی سەردەمی منداڵی خۆی کە تێیدا درێسی ریال مەدریدی پۆشیوە. کڵاودیا کە پێشتر بە ئاشکرا باسی لەوە کردبوو کە هاندەری ریال مەدریدە، پەیامێکی روونی ئاراستە کردبوو: “پڕم لە دڵخۆشی و شانازی، با سەرکێشییەکە دەست پێبکات.”

پەیامەکەی کڵاودیا رۆدریگێز

نازانم چۆن ماڵاوایی لە ماڵەکەم بکەم. سوپاس بۆ هەر کەسێک کە بەشێک بووە لەم ئەزموونە؛ هەست بە بەختەوەرییەکی بێوێنە دەکەم بۆ هەموو ئەو شتانەی کە لەم ساڵانەی دواییدا پێکەوە بەشمان کردووە. من بە دوو کۆرپەوە گەیشتم و ئێستا بە دوو کوڕی گەنج و کچێکی بچووکی بەریتانییەوە دەڕۆم، نازانم چۆن بۆیان روون بکەمەوە کە چێڵسی چیدیکە بەشێک نییە لە ژیانمان. هەموو ئەو شتانەی لەم ساڵانەدا ئەزموونمان کردووە، گەشتێکی فێربوونی رەها بووە؛ بە هەموو شتێکدا تێپەڕین، بەڵام لە سەرووی هەموو شتێکەوە، چێژمان لەم سەرکێشییە بینی. سوپاس بۆ هەموو ئەو کەسانەی کە بەشێک بوون لەم بەشەی ژیانمان، سوپاس بۆ کچەکانم کە زۆر بیرتان دەکەم و سوپاس بۆ هەر هاندەرێکی بلوز کە ناسیومە. هیوای باشترینتان بۆ دەخوازم؛ لەندەن هەمیشە شین دەبێت.

بەرزکردنەوەی هۆشیاری سەبارەت بە ئۆتیزم

مارک و کڵاودیا دایک و باوکی سێ منداڵن: ماتیۆ، ریۆ و بێلا، کە لە ساڵانی 2019، 2021 و 2023 لەدایکبوون. ئەم دووانە بە ئاشکرا باسیان لە دەستنیشانکردنی کوڕە گەورەکەیان بە نەخۆشیی شەبەنگی ئۆتیزم کردووە و ئەزموونی رۆژانەی خۆیان بە شێوەیەکی سروشتی بەش دەکەن لە کاتێکدا یارمەتیدەرن لە بەرزکردنەوەی هۆشیاری و ئاساییکردنەوەی ئەو ئالەنگارییانەی کە وەکوو خێزانێک رووبەڕوویان دەبێتەوە.

کوکورێیا لە چاوپێکەوتنێکدا لە کەناڵی یوتیوبی La Media Inglesa گوتی:

لایەنێکی نەرێنی هەیە؛ هەموو شتێک پێویستی بە هەوڵی زیاترە، هەموو شتێک قورسترە. بەڵام لایەنێکی ئەرینیش هەیە؛ کاتێک دەگەیتە شتێک، تەنانەت هەنگاوێکی بچووکی بەرەو پێشەوە، قایلبوونێکی زۆر گەورەتر دەهێنێت.