تاتۆیەکی رووخساری دێلا فوێنتێ دەکەم؛ مارک کوکورێیا لە ئەگەری بردنەوەی مۆندیال بەڵێنێکی سەرنجڕاکێش دەدات
ئەگەر سەرۆک بم ئالۆنسۆ هەڵدەبژێرم نەوەکوو مۆرینیۆ
یاریگا –
خوانما کاستانیۆ لە رۆژی دەستپێکردنی مۆندیالدا چاوپێکەوتنی لەگەڵ مارک کوکورێیای بەرگریکاری ئیسپانیا کردووە، چوار رۆژ پێش یەکەم یاریی ئیسپانیا لەژێر سەرپەرشتی لویس دێلا فوێنتێ.
بەرگریکارەکەی ئیسپانیا یەکەم میوان بوو کە لە کەمپی مەشقی تیمەکە لە چاتانوگا لە بەرنامەی El Partidazo de COPE دەرکەوت. لە گفتوگۆیەکی درێژدا لەگەڵ خوانما کاستانیۆ، بەرگریکاری باڵی چێڵسی باسی لە دۆخی ئێستای تیمی نیشتمانی کرد پێش مۆندیال، دەربارەی داهاتووی خۆی دوا و هەندێک بۆچوونی کەسیی باسکرد.
چاوەڕواننەکراوترین بەڵێن
کاتێک پرسیاری لێکرا کە چ بەڵێنێک دەدات ئەگەر ئیسپانیا مۆندیال بباتەوە، کوکوڕێیا دوودڵ نەبوو لە سەرسامکردنی هەمووان. دوای سوورکردنی قژی لە ماوەی جامی یۆرۆدا، یاریزانەکە بەڵێنیکی گەورەتریدا و گوتی:
دەتوانم تاتۆیەکی بچووکی رووخساری لویس دێلا فوێنتێ بکەم.
ئەو تەنانەت پێشنیاری شوێنەکەشی کرد، سەر قۆڵ، بە هۆی ئەوەی کە “مۆندیال لە یۆرۆ گەورەترە” و شایەنی یادەوەرییەکی تایبەتە.
💥🇪🇸 OJO a la promesa de @cucurella3 si España gana el Mundial…
😳 “Me tatúo la cara de Luis de la Fuente”
📻 #PartidazoCOPE pic.twitter.com/VcHDl2ga6t
— El Partidazo de COPE (@partidazocope) June 11, 2026
کەشی نێو تیمی نیشتمانی
کۆکوڕێیا تیشکی خستەسەر کەشی ئەرێنی نێو پێکهاتەی تیمەکە. ئەو پێی وایە ئەوان گرووپێکی باشن کە تێیدا خۆگونجاندن ئاسانە. لە کاتی قسەکردندا دەربارەی یاریزانە لاوەکان، ستایشی پێگەیشتوویی لامین یامالی کرد و گوتی:
من بە هێمنتر دەیبینم، وەکوو بڵێی گەورە بووە. ئەو لە تەمەنێکی زۆر لاودا ئەزموونی شتگەلێکی کردووە و زۆر بە باشی مامەڵەی لەگەڵدا کردوون. پێم وانییە منیش لە تەمەنی ئەودا بوومایە هەمان شتم کردبایە.
کات بۆ گاڵتەکردنیش هەبوو دەربارەی رۆدری، کە وەکوو کەسێکی تاوەکوو رادەیەک جدی وەسفی کرد، چونکە زۆر حەزی لە گفتوگۆ و گفتوگۆی درێژخایەنە.
هاوكات هاوڕێیەتییە نزیکەکەی خۆی لەگەڵ گریمالدۆ دووپاتکردەوە، کە رکابەرییەتی بۆ پێگەی بەرگریکاری چەپ، و پێداگری لەوە کرد کە بێ گوێدانە ئەوەی کێ یاری دەکات پەیوەندییەکەیان ناگۆڕێت، لە کۆتاییشدا ئاماژەی بەوە کرد کە تەنیا بوونی لە لەوێ خۆی لە خۆیدا پاداشتێکە و ئەرکێکی زۆر سەختیشە. هەروەها گوتی:
جۆش و خرۆشی یاریکردن لە مۆندیال وادەکات هەموو شتێک فەرامۆش بکەیت.
بە وەبیرهێنانەوەی مۆندیالی 2010، کە لە تەمەنی 11 ساڵیدا ئەزموونی کردبوو، فێرناندۆ تۆرێسی وەکوو نموونەی باڵای خۆی دەستنیشان کرد. لە بەراوردکردنی تیمی ئەو کاتی ئیسپانیا لەگەڵ تیمی ئێستا، دانی بەوەدا نا کە تیمەکەی ساڵی 2010، حەوت یان هەشت ئەفسانەی تۆپی پێی هەبوو، بەڵام بەرگری لە پێکهاتەی ئێستاش کرد و گوتی: “رکابەرییان دەکەین، بەڵام قورس دەبێت.”
داهاتوو و لایەنی کەسی
سەبارەت بە داهاتووی خۆی و گرنگیپێدانی چەندین یانە، کوکوڕێیا زۆر روون بوو و ئاماژەی بەوە کرد کە داوای لە خەڵک کردووە لە ماوەی پاڵەوانییەتییەکەدا هیچ شتێکی پێ نەڵێن. بەرگریکارەکە گوتی:
نامەوێت هیچ شتێک بزانم. دەمەوێت چێژ لەمە وەربگرم. دادپەروەرانە نابێت کە بیر لە شتی دیکە بکەمەوە. حەزم لە هەڵگرتنی نیگەرانییەکان نییە؛ لەگەڵ خێزانەکەم بەشی پێویستم هەیە.
یاریزانەکە بە ئاشکرا دەربارەی ئەو ئاڵەنگارییانە دوا کە خێزانەکەی رووبەڕووی بوونەتەوە و گوتی:
هەمووان پێیان وایە ژیانمان نایابە و هەموو شتێک بێ کەموکوڕییە، بەڵام لە کۆتاییدا ئێمەش وەکوو هەر کەسێکی دیکە کێشەمان هەیە. سوپاسی هەموو ئەوانە دەکەم کە پاڵپشتیان کردووم.
لە کۆتا پرسیار و وەڵامی خێرادا، کوکورێیا بەهای بازاڕی خۆی بە 35-45 ملیۆن یۆرۆ خەمڵاند و گوتی دۆناڵد ترەمپی سەرۆکی ئەمریکا دوای بینینی لە ساڵی رابردوودا ئەوی لەبیر دەبێت. ئەگەر ئەو سەرۆکی یانەیەکی تۆپی پێش بووایە، چابی ئالۆنسۆی لەبری جۆزێ مۆرینیۆ هەڵدەبژارد.
