یاریگا –
ئەمڕۆ دووشەممە بەڕێز نێچیرڤان بارزانی، سەرۆکی هەرێمی کوردستان، لە هەولێر پێشوازی لە گەنجە سەرکەوتوو و پاڵەوانی نێودەوڵەتیی کورد، نامۆ فازڵ کرد.
ستایشی دەستکەوتێکی جیهانی
ئەم پێشوازییە دوای ئەوە دێت کە نامۆ فازڵ، وەک وەرزشوانێکی بەتوانای کورد، لەم دواییانەدا توانی لە ویلایەتە یەکگرتووەکانی ئەمریکا سەرکەوتنێکی گەورە و مێژوویی لە یاریی هونەرە جەنگییە تێکەڵاوەکان (MMA) بەدەستبهێنێت و ناوی خۆی و کوردستان لە ناوەندە وەرزشییە جیهانییەکاندا تۆمار بکات.
پەیامی سەرۆکی هەرێم بۆ گەنجان و وەرزشوانان
لە دیدارەکەدا، سەرۆکی ههرێمی كوردستان وێڕای ئاراستەکردنی پیرۆزباییەکی گەرم بۆ ئەو دەستکەوتە باڵایە، دەستخۆشی لە نامۆ فازڵ کرد بۆ ئەو کۆشش و ماندووبوونەی کە لەم وەرزشە قورسەدا کێشاوێتی.
جەختی لەوە کردەوە کە سەرۆکایەتی هەرێم هەمیشە بە شانازییەوە سەیری توانای گەنجانی کوردستان دەکات و پاڵپشتی خۆی بۆ هەموو ئەو وەرزشوانانە دووپاتکردەوە کە دەبنە باڵیۆزی کوردستان لە مەیدانە نێودەوڵەتییەکاندا.
هەروەها هیوای بەردەوامی و سەرکەوتنی زیاتری بۆ خواست تاوەکو لە داهاتوودا نازناوی گەورەتر بۆ گەلەکەی بەدەستبهێنێت.
پێزانینی پاڵەوان نامۆ فازڵ
نامۆ فازڵ خۆشحاڵیی خۆی بۆ دیداری سەرۆکی ههرێمی كوردستان نێچیرڤان بارزانی دەربڕی.
نامۆ ئاماژەی بەوەکرد کە ئەم جۆرە پێشوازی و گرنگیپێدانانە لەلایەن بەرزترین دەسەڵاتی هەرێمەوە، هاندەرێکی گەورە و کاریگەرە بۆ ئەو و تەواوی وەرزشوانانی تری کوردستان، تاوەکو بە وزەیەکی زیاترەوە بەردەوام بن لە بەدەستهێنانی سەرکەوتنەکان.
نامۆ فازڵ سوپاس و پێزانینی خۆی بۆ پاڵپشتییە بەردەوامەکانی سەرۆکی هەرێم دەربڕی کە هەمیشە وەک پشتیوانێکی ڕاستەقینەی گەنجان و داهێنەرانی بوارە جیاوازەکان دەرکەوتووە.