تەنیا لەسەر کات وەستاوە؛ مۆرینیۆ راهێنەری ریال مەدریدە

یاریگا –

گەڕانەوەی جۆزێ مۆرینیۆ بۆ ریال مەدرید وەکوو دەگوترێت ئێستا تەنیا لەسەر کات وەستاوە.

بەگوێرەی رۆژنامەی مارکا، راهێنەرە پۆرتوگالییەکە نەوەکوو هەر نزیکە، بەڵکوو بەڕێژەی 99.9% بە دڵنیاییەوە دەبێتە راهێنەری داهاتووی یانەکە. مەگەر گۆڕانکارییەکی دراماتیکی لە دوایین ساتەکاندا روو بدات، ئەگەرنا مۆرینیۆ جێگەی ئالڤارۆ ئاربێلوا دەگرێتەوە و دەبێتە چوارەم راهێنەری تیمی یەکەمی ریال مەدرید لە ماوەی کەمتر لە ساڵێکدا، ئەمەش دوای کارلۆ ئانچێلۆتی، چابی ئالۆنسۆ و خودی ئاربێلوا.

مۆرینیۆ ئێستا وەکوو تاکە بژاردەی لۆژیکی دەبینرێت. تاوەکوو ئەم دواییانەش، ناوی وەکوو ماوریسیۆ پۆچێتینۆ و دیدییە دیشامپ لەبەرچاو دەگیران، هەرچەندە مۆرینیۆ هەمیشە وەکوو بەربژێری سەرەکی سەیر دەکرا. سەرەڕای ئەوەش، رووداوەکانی ئەم دواییەی یانەکە، لەوانەش شەڕەکەی نێوان چوامێنی و ڤاڵڤێردی و تووڕەیی ئێمباپێ لە ئاربێلوا دوای یارییەکەی ریال ئۆڤیێدۆ، پاڵپشتییەکانیان بۆ مۆرینیۆ بەهێزتر کردووە. لەنێو یانەکەدا وەکوو تاکە کەسایەتی دادەنرێت کە توانای گەڕاندنەوەی رێکخراویی بۆ نێو ژووری خۆگۆڕین هەبێت، کە زۆر کەس ئێستا بە شێواو و پڕ لە پشێویی وەسفی دەکەن.

پرۆسەی هەڵبژاردنی سەرۆکایەتی کە لەم دواییانەدا راگەیەندرا و لە لایەن فلۆرێنتینۆ پێرێزەوە دوای کۆنگرە رۆژنامەوانییە رۆژی سێشەممە دەستی پێ کرد، چاوەڕوان ناکرێت کاریگەری لەسەر هاتنی مۆرینیۆ هەبێت. چوونەنێو بێرنابیۆ پێدەچێت کاتێک روو بدات کە ریال مەدرید لە 23ـی ئایاردا کۆتایی بە وەرزەکەی بهێنێت.

بەگوێرەی سەرچاوەکە، دەستووری یانەکە دڵنیایی بەردەوامبوونی کارە ئاساییەکان دەکات لە کاتی هەڵبژاردنەکاندا، تەنانەت ئەگەر کاندیدێکی دیکەش لە هەفتەکانی داهاتوودا کێبڕکێی فلۆرێنتینۆ پێرێز بکات.

فلۆرێنتینۆ خۆی لە کاتی چاوپێکەوتنەکەیدا لەگەڵ کەناڵی La Sexta بە شێوەیەکی ناڕاستەوخۆ پاڵپشتی گەڕانەوەی مۆرینیۆی کرد. کاتێک پرسیاری لێکرا دەربارەی راهێنەرە پورتوگالییەکە، گوتی:

ئەو پێشتریش لێرە بووە و ئاستی ئێمەی بەرز کردەوە.

جێی سەرنجە، مۆرینیۆ تەنیا راهێنەر بوو کە فلۆرێنتینۆ لەو چاوپێکەوتنەدا باسی کرد.

لەنێو ریال مەدرید، زۆر کەس پێیان وایە قۆناخی یەکەمی کارکردنی مۆرینیۆ لە یانەکە لە ساڵی 2010 تاوەکوو 2013 بناخەی ئەو سەرکەوتنانەی دانا کە لە دواییدا هاتن، لەوانەش چوار نازناوەکەی چامپیۆنزلیگ کە لە نێوان ساڵانی 2014 و 2018 بەدەست هاتن.

بابەتەکانی دیکە، وەکوو جێهێشتنی بێنفیکا لە لایەن مۆرینیۆوە لە رێگەی پێدانی سێ ملیۆن یۆرۆ وەکوو مەرجی هەڵوەشاندنەوەی گرێبەست، لەنێو ریال مەدرید وەکوو کێشەیەکی تاوەکوو رادەیەک ئاسان بۆ چارەسەرکردن سەیر دەکرێن.

ئەوەی کە پێویستی بە کاری زیاترە، بنیادنانەوەی پێکهاتەی تیمەکەیە. یانەکە چاوەڕوانی هاوینێکی جەنجاڵ دەکات، کە هەم رۆیشتنی یاریزانان و هەم گرێبەستی نوێ لەخۆدەگرێت و چاوەڕوان دەکرێت مۆرینیۆ کاریگەرییەکی بەرچاوی لەسەر ئەو بڕیارانە هەبێت.

بۆ ئێستا، تەنیا شتێک کە مابێت، راگەیاندنی فەرمییە لە لایەن ریال مەدریدەوە، کە چاوەڕوان دەکرێت لە رۆژانی داهاتوودا رابگەیەنرێت.