خولی نەتەوەکانی ئاسیا؛ یەکێتی تۆپی پێی ئاسیا گۆڕانکارییەکی گەورە دەکات
هاوشێوەی خولی نەتەوەکانی ئەوڕوپا
یاریگا –
یەکێتی تۆپی پێی ئاسیا بە فەرمی دەستپێکردنی خولی نەتەوەکانی ئاسیای راگەیاند.
لە ساڵانی رابردوودا خولی نەتەوەکانی ئەوروپا (نەیشنزلیگ) دەریخستووە کە تۆپی پێی نێودەوڵەتی دەتوانێت شوێنی یارییە دۆستانەکان بگرێتەوە و ببێتە کێبڕکێیەکی سەرەکی و پڕچێژ لەلای هاندەران. پاڵەوانێتییەکە کە بۆ یەکەمجار لەلایەن یەکێتی تۆپی پێی ئەوروپاوە لە ساڵی 2018 دەستیپێکرد، بە ئامانجی بەرزکردنەوەی کوالیتی پێشبڕکێ نێودەوڵەتیەکان و دروستکردنی هاوسەنگییەکی کێبڕکێ لە نێوان تیپەکان و پێدانی پاڵنەرێکی راستەقینە بە هاندەرانی فیفا؛ پێشبڕکێیەک کە بە خێرایی جێگەی خۆی لە نێو هاندەراندا بەدەستهێنا و تەنانەت بوو بە رێگایەک بۆ پاڵاوتن بۆ یۆرۆ و مۆندیال.
خولی نەتەوەکانی ئەوروپا بە شێوەیەکی کردەیی سەلماندوویەتی کە “بەریەککەوتنی هەڵبژاردە بەهێزەکان” دەتوانێت هەم سەرنجڕاکێش بێت و هەم سوودی هەبێت ئەگەر لە چوارچێوەیەکی دروستدا پێناسە بکرێت. ئێستا تۆپی پێی ئاسیا لە لێواری ئەزموونێکی هاوشێوەدایە. شانبەشانی پاڵەوانێتی جامی ئاسیا کە لە مێژە هەیە، بڕیارە “خولی نەتەوەکانی ئاسیا” بەڕێوە بچێت؛ پێشبڕکێیەک کە دەتوانێت هەڵبژاردەکان لە یارییە ئامادەکارییە دۆستانەکان رزگار بکات.
AFC to introduce Nations League as part of its ongoing efforts to enhance Member Associations development opportunities.https://t.co/z3jdQbkXo1
— AFC (@theafcdotcom) December 21, 2025
بیرۆکەی رووبەڕووبوونەوەی یەک لە دوای یەک لە نێوان هەڵبژاردە بەهێزەکانی وەک ژاپۆن، کۆریای باشوور، ئوردن، سعودیە، ئوسترالیا و قەتەر لە شێوەی خولێکی فەرمیدا بەڵێنی سەردەمێکی نوێی کێبڕکێی نێودەوڵەتی دەدات کە دەتوانن باشتر خۆیان بۆ جامی جیهانی ئامادە بکەن.
یەکێتی تۆپی پێی ئاسیا لە راگەیاندراوەکەی دەڵێت:
یەکێتی تۆپی پێی ئاسیا پابەندبوونی خۆی بە بەهێزکردنی تۆپی پێی نێودەوڵەتی لە سەرانسەری کیشوەرەکەدا دووپاتکردەوە و پلانەکانی خۆی بۆ ناساندنی خولی نەتەوەکانی ئاسیا لە داهاتوویەکی نزیکدا راگەیاند، ئەمەش هاوتەریب لەگەڵ هەوڵە بەردەوامەکانی یەکێتییەکە بۆ زیادکردنی دەرفەتی گەشەپێدان بە ئەندامەکان و دروستکردنی چوارچێوەیەکی یەکگرتووتر و بەردەوامتر بۆ پێشبڕکێ نێودەوڵەتییەکان.
وردەکاری زیاتر لەسەر فۆرمات و کات و جێبەجێکردنی خولی نەتەوەکانی ئاسیا لە رێگەی لێژنە پەیوەندیدارەکانی یەکێتی تۆپی پێی ئاسیا و دوای راوێژکردن لەگەڵ لایەنە پەیوەندیدارەکان پێداچوونەوەی بۆ دەکرێت، و لە کاتی گونجاودا بە فەرمی رادەگەیەنرێت.
