ماتا پەیوەندی بە یانەیەکی ئوسترالی کرد

یاریگا –

خوان ماتا بڕیاریداوە هەر لە ئوسترالیا بمێنێتەوە و پەیوەندی بە یانەیەکی دیکە کرد.

یاریزانی پێشووی چێڵسی و مانچێستەر یونایتد، ساڵی رابردوو گرێبەستی لەگەڵ یانەی وێسترن سیدنی واژۆکرد و لە کۆی وەرزەکە بەشداری لە 23 یاریدا کرد. ماتا ئەمڕۆ پەیوەندی بە یانەی مێلبۆرن ڤیکتری کرد و گرێبەستێکی بۆ ماوەی یەک ساڵ واژۆکرد.

ماتا یەکێکە لە دیارترین ئەستێرەکانی ئیسپانیا و پێشتر مۆندیال و یۆرۆی لەگەڵ هەڵبژاردەی ئیسپانیا بەدەستهێناوە.

ماتا لە تورکیا یاریی بۆ گاڵاتەسەڕای کرد و لە ژاپۆنیش یاریی بۆ ڤیسێل کۆبێ کرد. لەگەڵ مان یونایتد جامی FA، جامی کاراباو و یۆرۆپالیگی بردەوە.

ئەستێرە ئیسپانییەکە بەرهەمی ئەکادیمیای ریال مەدریدە، دوای پەیوەندیکردنی بە ڤالێنسیا و پێشکەشکردنی ئاستێکی بەرز، پەیوەندی بە چێڵسی کرد و لەگەڵ یانەکە نازناوی چامپیۆنزلیگی بردەوە.