هانزی فلیک پشوو بە ئەستێرەیەکی دەدات

یاریگا –

رافینیا، ئەستێرەی بەڕازیلی بارسێلۆنا، کە بەهۆی ماندوێتی لە یارییەکەی بەرامبەر بروسیا دۆرتمۆند یاریگای جێهێشت، رەنگە لە یاریی ئەمشەو بەرامبەر لیگانێس لەسەر کورسی یەدەگ بێت و پشوو بدات.

رافینیا لەم وەرزەدا لە ژێر دەستی هانزی فلیک پێشکەوتنی بەرچاوی بەدەستهێناوە. گۆڵەکانی وایکردووە بارسێلۆنا لە لالیگا و چامپیۆنزلیگ لە پێگەیەکی باشدا بێت. ئاستی رافینیا لە سێ یارییە گەورەکەی بارسێلۆنا تا ئێستا لەم وەرزەدا بەرامبەر بایرن میونشن و ریال مەدرید و بروسیا دۆرتمۆند جێگای دەستخۆشی بوو، چونکە توانی لەم سێ یارییەدا پێنج گۆڵ بکات و یەکێک بوو لە پایە سەرەکییەکانی سەرکەوتنی تیپەکەی لەم یارییە سەخت و هەستیارانەدا.

ئەستێرە بەڕازیلییەکە کە هاوشانی لامین یامال و رۆبێرت لیڤاندۆڤسکی سێگۆشەی ترسناکی لە هێڵی هێرشبەری بارسا پێکهێناوە، بەهۆی ماندوێتی لە یاری بەرامبەر بروسیا دۆرتمۆند یاریگای جێهێشت. هیچ پێکانێکی تایبەتی نییە، بەڵام رەنگە هانزی فلیک پوشووی پێبدات بەرامبەر لیگانێس تاوەکوو تووشی پێکان نەبێت. بەگوێرەی رۆژنامەی ئاس ئەگەری ئەوە هەیە رافینا لەسەر کورسی یەدەگ دابنیشێت.

فران تۆرێس کە لە چەند هەفتەی رابردوودا ئاستێکی زۆر باشی لە بارسێلۆنا پێشکەش کرد، ئەگەری زۆرە لە شوێنی رافینیا ئەمشەو یاریی بکات.