تایبەت بە یاریگا؛ سەری ساڵ هێرشبەرێکی هەڵبژاردەی عێراق پەیوەندی بە یانەی زاخۆ دەکات

یاریگا –

زاخۆ لەگەڵ ئەحمەد یاسین گەیشتە رێککەوتن، هێرشبەرەکەی هەڵبژاردەی عێراق سەری ساڵ پەیوەندی بە یانەکە دەکات.

بەگوێرەی زانیارییەکانی تۆڕی وەرزشی یاریگا، یانەی زاخۆ لەگەڵ ئەحمەد یاسین هێرشبەری هەڵبژاردەی عێراق و یانەی ئۆرێبرۆی سویدی گەیشتووەتە رێککەوتن، سەرەتای ساڵی نوێ پەیوەندی بە ریزەکانی زاخۆ دەکات و لەگەڵ ئەو یانەیە دەست بە مەشق و راهێنان دەکات.

پێشتر تۆڕی وەرزشی یاریگا وەکو یەکەم سەرچاوە رایگەیاندبوو، زاخۆ دەستی بە هەوڵەکانی کردووە بۆ ئەوەی سەرەتای ساڵی نوێ لە بازاڕی گواستنەوەی زستانەی یاریزانان هێرشبەرە کوردەکەی هەڵبژاردەی عێراق بگوازێتەوە ریزەکانی.

ئەحمەد یاسین (33 ساڵان) هاوینی رابردوو لە یانەی خلودی سعوودییەوە روویکردە ریزەکانی ئۆرێبرۆی سویدی و ئە مانگە لەلایەن خیسوس کاساسەوە بانگهێشتی هەڵبژاردەی عێراق کرایەوە و لە یاریی بەرامبەر عومان کاپتنی شێرەکانی رافیدەین بوو، کە لە یارییەکە ئاستێکی بەرزی پێشکەش کرد و بە گۆڵێکی بێبەرامبەر بردنەوەیان بەدەستهێنا.

کوڕە کوردەکەی خولی سویدی بە درێسی هەڵبژاردەی عێراق خاوەنی 61 یاری و 6 گۆڵ و 8 ئەسیستە، کە دەتوانێت وەکو یاریزانی باڵی راست و چەپ و هێرشبەری سەرەڕم و یاریساز یاریی بکات.

ئەحمەد یاسین بە درێسی خلود لە خولی پلەیەکی سعوودی لە 35 یاری 8 گۆڵ و 4 ئەسیستی کرد، پێشتر درێسی یانەی خۆری قەتەڕیشی پۆشیوە و لە خولی ئەستێرەکانی قەتەڕ یاریی کردووە، کە ئێستا لە بۆرسەی یاریزانان بەهای ئەو هێرشبەرە کوردە 325 هەزار یۆرۆیە.