ئەمشەو رێوڕەسمی دابەشکردنی خەڵاتەکانی باڵۆن دۆر بەڕێوە دەچێت

یاریگا –

ئەمشەو کاتژمێر 10:00 (بە کاتی هەولێر) رێوڕەسمی دابەشکردنی خەڵاتەکانی باڵۆن دۆری 2024 لە هۆڵی شانۆی چاتێلێت لە پاریس بەڕێوە دەچێت، هەریەکە لە دیدیێ درۆگبا ئەستێرەی پێشووی کۆتدیڤواری و ساندی هێریبێرت خانمە رۆژنامەنووسی فەڕەنسی رێوڕەسمەکە بەڕێوە دەبەن.

10 خەڵاتی جیاواز دابەش دەکرێن

خەڵاتی باشترین یاریزانی جیهان لەسەر ئاستی خانمان و پیاوان، خەڵاتی باشترین راهێنەری جیهان لەسەر ئاستی پیاوان و خانمان، خەڵاتی باشترین یانەی وەرزشی لەسەر ئاستی پیاوان و خانمان، خەڵاتی کۆپا بۆ باشترین یاریزانی لاوی جیهان، خەڵاتی یاشین بۆ باشترین گۆڵپارێزی جیهان، خەڵاتی جێرد مولەر بۆ گۆڵکاری ساڵ و خەڵاتی سۆکراتس بۆ کاری مرۆیی دابەش دەکرێن.

کێ بۆ یەکلاکردنەوەی براوەی خەڵاتەکانی باڵۆن دۆر دەنگ دەدات؟

سەرنووسەر و بەڕێوەبەری نووسینی گۆڤاری فڕانس فوتبۆڵ و رۆژنامەی لیکیپ لیستی کۆتایی بەربژێرەکانی خەڵاتەکانی باڵۆن دۆر دەستنیشان دەکەن، 100 رۆژنامەنووس لە 100 وڵاتی جیاواز دەنگ بۆ بەربژێرەکان دەدەن، کە ئەو 100 وڵاتەی لە ریزبەندیی فیفا لە سەرووی لیستەکە دێن نوێنەریان دەبێت بۆ دەنگدان بۆ براوەی باڵۆن دۆر، هەر رۆژنامەنووسێک لەو 30 یاریزانەی بەربژێر کراون مافی هەیە دەنگ بۆ 10 بەربژێر بدات و بەگوێرەی ریزبەندییان خاڵ بەسەریان دابەش دەکرێت.

یەکەمی لیستەکە لەو 10 یاریزانەی لەلایەن رۆژنامەنووسەکان هەڵدەبژێردرێن، 15 خاڵی پێدەدرێت، پلەی دووەم 12 خاڵ و پلەی سێیەم 10 خاڵی پێدەدرێت، پلەکانی چوارەم و پێنجەم و شەشەم و حەفتەم و هەشتەم و نۆیەم و دەیەم  8, 7, 5, 4, 3, 2 و 1 خاڵیان پێدەدرێت.

براوەی باڵۆن دۆر چەند پارەی پێدەدرێت؟

ئەو یاریزانەی خەڵاتی باڵۆن دۆر دەباتەوە هیچ بڕە پارەیەکی لەلایەن سەرپەرشتیارانی خەڵاتەکە پێنادرێت، بەڵکو تەنیا تۆپێكی زێڕینی پێدەدرێت کە نرخی ئەو خەڵاتە لە بازاڕ دەگاتە نزیکەی نیو ملیۆن دۆلار.

براوەی خەڵاتی باڵۆن دۆر تەنیا بلیتی ئامادەبوونی لە ئاهەنگی دابەشکردنی خەڵاتەکانی باڵۆن دۆری پێدەدرێت، تاهەتایە براوەی باڵۆن دۆر دەتوانێت ئامادەی ئاهەنگەکانی دابەشکردنی خەڵاتەکانی باڵۆن دۆر بێت.

میدیاکانی ئیسپانیا: ڤینیسیۆس جونیۆر خەڵاتی باڵۆن دۆر دەباتەوە و لامین یامال خەڵاتی کۆپا بەدەست دەهێنێت

گۆڤاری فڕانس فوتبۆڵ رەتیدەکاتەوە تاوەکو ساتی بەڕێوەچوونی رێوڕەسمەکە براوەی خەڵاتەکانی باڵۆن دۆری 2024 ئاشکرا بێت و گۆڤاری فڕانس فوتبۆڵ کە خەڵاتەکانی باڵۆن دۆر دابەش دەکات، بڕیاریداوە پێش رێوڕەسمەکە هیچ دیمانەیەک لەگەڵ براوەی خەڵاتەکە نەکات، بەڵکو دوای رێوڕەسمی دابەشکردنی خەڵاتەکانی باڵۆن دۆر دیمانە لەگەڵ براوەی باڵۆن دۆر دەکات.

بەڵام میدیاکانی ئیسپانیا ئاشکرایان کردووە، ڤینیسیوس جونیۆر هێرشبەری بەڕازیلی یانەی ریال مەدریدی ئیسپانی خەڵاتی باڵۆن دۆری 2024 دەباتەوە و لامین یامال هێرشبەری ئیسپانی یانەی بارسێلۆنا خەڵاتی کۆپا بۆ باشترین یاریزانی لاو بەدەست دەهێنێت.