یاریگا –
راپۆرتە رۆژنامەوانیەكان ئاشكرایانكرد، ماسیمیلیانۆ ئالێگری راهێنەری پێشووی یوڤێنتوس پاڵێوراوی وەرگرتنی پۆستی راهێنەرایەتیكردنی مانچێستەر یونایتدە.
دوێنی مانچێستەر یونایتد لە یاریگای ئۆڵد ترافۆردی تایبەت بە خۆی میوانداری تۆتنهامی كرد و یارییەكەش بە سێ گۆڵی بێ وەڵام لە بەرژەوەندی یانەی میوان كۆتایی هات، لە میانی یارییەكانی هەفتەی شەشەمی پرێمەرلیگ.
— Manchester United (@ManUtd) September 29, 2024
بە گوێرەی زانیاریەكانی تۆڕی Caughtoffside تا دێت فشارەكان لەسەر ئێریك تێن هاخ زیاتر دەبن و یارییەكانی داهاتوو بۆ داهاتووی راهێنەرە هۆڵەندیەكە چارەنوسساز دەبن.
لە راپۆرتەكەدا هاتووە، چەند كەسایەتییەكی دیار لە ناو یانەكەدا پێیان وایە ئالێگری راهێنەرێكی گونجاو بێت بۆ ئەوەی ئەركی راهێنەرایەتیكردنی یانەكە وەربگرێت و جێگای تێن هاخ بگرێتەوە.
ئاماژە بەوەشكراوە، ئەگەر تێن هاخ نەتوانێت لە یارییەكانی داهاتوودا ئاستی تیمەكە بەرەو پێشەوە ببات ئەوا لە پۆستەكەی دووردەخرێتەوە و یانەكە دەستیكردووە بە گەڕان بە دوای شوێنگرەوەدا.
لە راپۆرتەكەشدا هاتووە، تاوەكو ئێستا هیچ گفتۆگۆیەك لە نێوان ئیدارەی شەیتانە سوورەكان و ماسیمیلیانۆ ئالێگریدا نەكراوە.
لە دوای دوورخستنەوەی لە پۆستی راهێنەرایەتیكردنی یوڤێنتوس تاوەكو ئێستا ئالێگری بێ یانەیە و راهێنەرایەتیكردنی هیچ یانەیەكی وەرنەگرتووە.
پێشتر ئالێگری وەك راهێنەر شەش نازناوی سێریا ئەی، سێ نازناوی سوپەری ئیتاڵی و پێنج نازناوی جامی ئیتاڵیای لەگەڵ ئەیسی میلان و یوڤێنتوس بەدەستهێناوە.
رۆژی پێنجشەممە لە دووەم یاری یۆرۆپالیگدا مانچێستەر یونایتد دەبێتە میوانی پۆرتۆ.
