یاریگا –
میکێل ئارتێتا، راهێنەری ئارسیناڵ گرێبەستەکەی بۆ ماوەیەکی درێژ لەگەڵ یانەکەی لەندەن نوێدەکاتەوە.
تۆڕی ئاتلێتیک بڵاویکردووەتەوە، ئارتێتا و ئارسیناڵ لەسەر نوێکردنەوەی گرێبەستەکەی تاوەکو هاوینی ساڵی 2027 گەیشتوونەتە رێککەوتن و بەمزووانە بە فەرمی گرێبەستەکەی واژۆ دەکات.
ئەم پەرەسەندەنە لەناکاوەی نێو قەڵای ئیمارات، چەند رۆژێک بەر لە یاریی دێربی باکووری لەندەن بەرامبەر تۆتنهام روویدا و ئەمەش کاریگەری لەسەر تەواوی تیمەکە دروستدەکات.
ئارتێتا لە ساڵی 2019 شوێنی یونای ئێمری گرتەوە و لەوساتەوە، چەند جارێک لە بەدەستهێنانی نازناوی پرێمەرلیگ نزیکببووەوە، بەڵام باڵادەستی مانچێستەر سیتی رێگربوو.
ئارتێتا لە ساڵی 2020 جامی FA بەدەستهێنا و لەدوای حەوت ساڵ دابڕان، ئارسیناڵی گەڕاندەوە چامپیۆنزلیگ و وەرزی رابردوو پلەی دووەمی پرێمەرلیگی بەدەستهێنا.
لەم وەرزەەدا، ئارسیناڵ لەکۆی سێ یاریدا حەوت خاڵی کۆکردووەتەوە و یاریی داهاتووی بەرامبەر تۆتنهامە.
ئارتێتا تووشی کێشەیەکی ئاڵۆزبووە، بەهۆی پێکان بێبەش دەبێت لە خزمەتەکانی میکێل مێرینۆ، ریکاردۆ کالافیۆری و مارتن ئۆدیگارد.
راهێنەرە ئیسپانییەکە لە ساڵی 2022 بۆ یەکەمجار گرێبەستەکەی لەگەڵ ئارسیناڵ نوێکردەوە و ئەمە دەبێتە دووەم نوێکردنەوەی گرێبەستی لە یانەکەی باکووری لەندەن.
ئارتێتا لە سان سێباستیان لەدایکبووە، بەرهەمی لاماسیایە و پێشتر کاپتنی ئارسیناڵ بووە.
لە مارس/ئاداری رابردوودا، راهێنەری تەمەن 42 ساڵان 100مین یاریی وەک راهێنەر لە پرێمەرلیگ کرد.
