ئەستێرە نوێیەکەی ریال مەدرید داوای هاوکاری لە ڤینیسیوس دەکات

یاریگا –

ئێندریک، هێرشبەرە نوێیەکەی لۆس بلانکۆس، داوای لە ڤینیسیۆس جونیۆر کردووە یارمەتی بدات تاوەکوو بتوانێت لەگەڵ کەشی ناو ریال مەدرید خۆی بگونجێنێت.

ریال مەدرید و بەتایبەتی فلۆرێنتینۆ پێرێز وەک سەرۆکی ئەم یانەیە لە چەند ساڵی رابردوودا نیشانیان داوە کە زۆر ئارەزووی راکێشانی ئەستێرە لاوەکانی بەڕازیلی دەکەن و دەتوانن سود لە بەهرە و تواناکانیان لە رکابەرییەکانی ئەوروپا و لالیگا وەربگرن، ئێستاش کاتی ئەستێر نوێیەکەیان ئێندرکە لەم تیپەدا تواناکانی خۆی نیشان بدات.

وێبسایتی فەرمی ریال مەدرید کاتی ناساندنی ئێندریکی راگەیاند و بڕیارە 27 ئەم مانگە لە سانتیاگۆ بیرنابیۆ بە ئامادە بوونی فێلێرێنتینۆ پێرێز و هاندەران گرێبەستەکەی واژۆ بکات. ئەم ئەستێرە بەڕازیلییە کە ئەمڕۆ تەمەنی بووە 18 ساڵ، هیوادارە، زۆر بە زوویی بتوانێت جێگەی خۆی لە پێکهاتەی سەرەکی ریال مەدرید بدۆزێتەوە و بە رێنماییەکانی کارلۆ ئەنچێلۆتی باشترین ئاستی خۆی پێشکەش بکات.

ماڵپەڕی رێلێۆڤۆی ئیسپانی لە بابەتێکی دا دەنوسێت، ئێندریک هەوڵدەدات بە زووترین کات خۆی لەگەڵ بارودۆخی یاریکردن و ژیان لە مەدرید بگونجێنێت، چ لە ناو یاریگا و چ لە دەرەوەی یاریگا، هەر بەم هۆیەشەوە لەگەڵ ڤینیسیۆس جونیۆر کە هاوتیمییەتی لە مەدرید و  هەڵبژاردەی بەڕازیل، قسەی کردووە و داوای یارمەتی لێی کردووە. ئەمە لە کاتێکدایە کە لەگەڵ رۆدریگۆش لەسەر ئەم بابەتە قسەی کردووە.

دوای ئاستە سەرسوڕهێنەرەکەی لە پاڵمیراس، ئێندریک رووبەڕووی چەندین ئۆفەری یانە گەورەکانی ئەوروپا بووەوە، بەڵام دواجار بڕیاریدا باشترین ئۆفەر کە ریال مەدریدە قبووڵ بکات. ئێستاش دەبێت چاوەڕێی ئەوە بکەین کە لە یارییەکانی وەرزی داهاتوودا بە درێسی ئەم تیپە باشترین ئاست پێشکەش دەکات یاخود نا.