یاریگا –
یەکێتیی تۆپی پێی عێراق هەڵوەشانەوەی پاڵەوانیەتیی یانە پاڵەوانەکانی عەرەبی پشتڕاستکردەوە.
سەرەڕای رێکخستنی دوو یاری پلەی ئۆفی بەشداریکردن لە پاڵەوانیەتیی یانەکانی عەرەبی و پاڵەوانیەتی یانەکانی کەنداو، کەچی دوای بەڕێوەچوونی دوو یاری پلەی ئۆف، هەڵوەشانەوەی پاڵەوانیەتیی یانەکانی عەرەبی راگەیێندرا.
لە دوای هەڵوەشاندنەوەی پاڵەوانیەتی یانەکانی عەرەبی، یەکێتیی تۆپی پێی عێراق کۆمەڵێک بڕیاری نوێی دەرکرد و چارەنووسی یانەکانی دهۆک و نەجەفی بۆ بەشداریکردن لە پاڵەوانیەتییەکە یەکلاییکردەوە
بڕیارەکانی یەکێتیی تۆپی پێی عێراق
- براوەی یاریی نێوان نەجەف و دهۆک بەشداری لە پاڵەوانیەتیی یانەکانی کەنداو دەکات.
- ئەگەر یەکێک لە یانەکانی نەجەف و دهۆک ئامادەنەبوو بەشداری لە پاڵەوانیەتییەکەدا بکات، ئەوا بلیتی بەشداریکردن بە تیمی دووەم دەدرێت.
- یەکێتیی تۆپی پێی عێراق جیاوازی لە نێوان هیچ یانەیەک ناکات و بە یەکسانی مامەڵەیان لەگەڵدا دەکات.
ئەم بڕیارانە لە کاتێکدایە، یانەی زەوڕا دوێنێ ئامادەی یاریی پلەی ئۆفی بەشداریکردن لە پاڵەوانیەتییەکانی دەرەکی لە بەرامبەر دهۆک نەبوو، یانەی هەڵۆکانی چیا 3-0 بە براوە داندرا. لە یاریی دووەمیشدا، یانەی نەجەف بە لێدانی یەکلاییکەرەوە لە یانەی زاخۆی بردەوە.
بڕیارە چوارشەممە کاتژمێر 19:30 لە یاریگای شەعب، یاریی نێوان نەجەف و دهۆک بەڕێوەبچێت و براوەی یارییەکە، بەشداری لە پاڵەوانیەتی یانەکانی کەنداو دەکات.
