یاریگا –
لە دوای ناساندنە مێژووییەکەی کیلیان ئێمباپێ لە سانتیاگۆ بێرنابیۆ، پرسیارەکان لەبارەی وردەکارییەکانی گرێبەستەکەی ورووژێندران.
کیلیان لە پاریس سانجێرمان زۆرترین مووچە و پاداشتی یانەکەی وەردەگرت، بەگوێرەی راپۆرتێکی لیکیپ، ئێمباپێ ساڵانە لە پاریس نزیکەی 200 ملیۆن یۆرۆی لە کۆی گشتی داهاتەکان وەردەگرت.
ئەمڕۆ رۆژنامەی مارکا وردەکاریی گرێبەستی ئێمباپێی بڵاوکردووەتەوە، بەراورد بە داهاتەکەی لە پاریس، زۆر کەمیکردووە، بەڵام تاوەکو ئێستا وردەکاری مافی وێنە و کەسێتی نێوان مەدرید و ئێمباپێ ئاشکرا نەکراوە.
بەگوێرەی راپۆرتی رۆژنامەکەبێت، مووچەی ساڵانەی ئێمباپێ دوای دەرکردنی باج و خەرجییەکان، دەگاتە 15 ملیۆن یۆرۆ و لە کۆی پێنج ساڵدا، کیلیان بڕی 100-115 ملیۆن یۆرۆ لە ریال مەدرید وەردەگرێت و دەبێتە خاوەن بەرزترین مووچە لە مێژووی ریال مەدریددا.
جیا لە مووچەی ساڵانە، ئێمباپێ 60% – 80% مافی وێنە و کەسی لە ریال مەدرید وەدەگرێت، بەڵام بەها و وردەکارییەکانی رێککەوتنەکە ئاشکرا نەکراون.
بڕگەیەکی دیکە لە گرێبەستی ئێمباپێ و ریال مەدریددا هاتووە، ئەگەر کیلیان باڵۆن دۆر یاخود نازناوی لەگەڵ مەدرید بردەوە، ئەوا بەگوێرەی رێککەوتنی نێوانیان پاداشت دەکرێت.
