بەفەرمی ئینزاگی گرێبەستەکەی نوێکردەوە

یاریگا –

بەشێوەیەکی فەرمی سیمیۆنی ئینزاگی گرێبەستەکەی لەگەڵ یانەی ئینتەر میلان نوێکردەوە.

ماڵپەڕی فەرمی ئینتەر میلان بڵاویکردووەتەوە، بەشێوەیەکی فەرمی راهێنەری ئیتاڵی سیمیۆنی ئینزاگی، گرێبەستەکەی لەگەڵ ئینتەر میلان تا هاوینی 2026 نوێکردووەتەوە.

ئینزاگی وەرزی رابردوو نازناوی سێریا ئەی لەگەڵ ئینتەر میلان بەدەستهێنا، لەکۆی 38 گەڕی خولەکە تیپەکەی 29 بردنەوەی بەدەستهێنا، لە 7 یاریی یەکسانبوون و 2 یاریش دۆڕان. بە کۆکردنەوەی 94 خاڵ و بەجیاوازی 19 خاڵ لەپێش ئەیسی میلانی دووەم بوونە پاڵەوانی خولەکە.

راهێنەرە تەمەن 48 ساڵانییەکە لە هاوینی 2021 وەک راهێنەری ئینتەر میلان دەستنیشانکرا، لەگەڵ ئینتەر لەکۆی 158 یاری 104 بردنەوەی بەدەستهێناوە، 28 یاری یەکسانبوو و 26 یاریش دۆڕاوە.

جیا لە نازناوێکی خولی ئیتالی دوو نازناوی جامی ئیتالیا و سێ نازناوی جامی سوپەری ئیتالیای لەگەڵ نێرازوری بەدەستهێناوە.