یانەیەکی ئیتاڵی ئامادەیە گرێبەست لەگەڵ سانچۆ بکات

یاریگا –

یوڤێنتوس ئامادەیە ئۆفەرێکی فەرمی بۆ گواستنەوەی جەیدن سانچۆ، پێشکەشی مانچێستەر یونایتد بکات.

رۆژنامەی سەن بڵاویکردووەتەوە، یوڤێنتوس ئامادەیە لە بازاڕی گواستنەوەی زستانەی داهاتوودا، بە خواستن سانچۆ بگوازێتەوە و بڕی 350 هەزار پاوەند، وەک مووچەی هەفتانە بە ئەستێرە ئینگلیزییەکە بدات.

هەروەها رۆژنامەکە نووسیویەتی، یوڤێ ئامادەیە لە دوای تەواوبوونی وادەی خواستنەکەی، بە بڕی 60 ملیۆن پاوەند، گرێبەست لەگەڵ سانچۆ واژۆ بکات و بە هەمیشەیی بیگوازێتەوە.

دوای دوو وەرز لە گواستنەوەی لە بۆڕووسیا دۆرتموندەوە بۆ مان یونایتد، ئێستا بە ساتێکی دژواردا تێدەپەڕێت، ئەمەش بەهۆی خراپی پەیوەندییەکانی لەگەڵ ئێریک تێن هاخ، راهێنەری یانەکە.

لە مانگی رابردوودا، تێن هاخ ناوی سانچۆی نەخستە نێو لیستی یاریزانانی یارییەکەی بەرامبەر ئارسیناڵ و هۆکارەکەی بۆ لاوازی ئاستی سانچۆ لە مەشقەکان گەڕاندەوە. لەوکاتەوە پەیوەندییەکانیان تێکچوون و تاوەکو ئێستاش بە تەنیا مەشقەکان دەکات.