چاڤی گرێبەستەكەی تەنیا بۆ وەرزێك نوێ دەكاتەوە
یاریگا –
راپۆرتە رۆژنامەوانیەكان ئاشكرایانكرد، چاڤی هێرناندێز راهێنەری ئیسپانی یانەی بارسێلۆنای هەمان وڵات لەگەڵ ئیدارەی یانەكەی گەیشتووەتە رێككەوتن سەبارەت بە نوێكردنەوەی گرێبەستەكەی.
گرێبەستەكەی ئێستای چاڤی لەگەڵ یانە كەتەلۆنییەكە لە هاوینی ساڵی 2024 بەسەردەچێت.
بەپێی زانیاریەكانی رۆژنامەی ماركا، چاڤی گرێبەستەكەی لەگەڵ یانەكە بۆ ماوەی وەرزێك و تا ساڵی 2025 نوێ دەكاتەوە.
چاڤی لە ناوی ئیدارەی یانەكەدا متمانەیەكی زۆری بۆ خۆی كۆكردووەتەوە، دوای ئەوەی سەركەوتوو بوو لە دووبارە گەڕانەوەی بارسێلۆنا بۆ بەدەستهێنانی خولی ئیسپانی دوای دابڕانیان بۆ ماوەی سێ ساڵ.
🚨🚨🚨 Xavi va RENOUVELER 1 an (2025) avec salaire DOUBLÉ !@Luis_F_Rojo pic.twitter.com/brgwPCniTe
— 𝑷𝒂𝒖𝒍 𝑭𝑪𝑩 📰 (@FCBPaul_) September 9, 2023
رۆژنامەكە ئاشكرایكردووە، بەهۆی یاسای یاری خاوێنەوە بارسێلۆنا ناچارە گرێبەستی راهێنەری یانەكەی تەنیا بۆ ساڵێك و تا هاوینی 2025 نوێ بكاتەوە، چاڤی داوایكردووە ماوەی نوێكردنەوەی گرێبەستەكەی زیاتر بێت بەڵام بارسا نەیتوانیوە زیاتر لە ساڵێك گرێبەستەكەی نوێ بكاتەوە.
بەڵام لە کۆتایی ئەم وەرزەدا ئەگەر دۆخی ئابووری یانە کەتەلۆنییەکە باشتر بێت، ئەگەری ئەوە هەیە جارێکی دیکە گرێبەستی چاڤی هێرناندێز نوێ بکرێتەوە، بەڵام لە ئێستادا تەنیا بۆ ماوەی ساڵێک گرێبەستەکەی واژۆ دەکات.
چاڤی لەگەڵ بارسێلۆنا توانیویەتی نازناوەكانی لالیگا و سوپەری ئیسپانیا بەدەستبهێنێت.
